Sisimiut: Isumannaatsumik atualeqqinneq pissaaq

Meeqqat atuarfianni aasaanerani atuanngiffiup kingorna, akunneq kingulleq atuartut atualeqqittussaagaluarput. Coronali pissutaalluni atualeqqinnissaq kinguartinneqarpoq. Maannali atuarfik ammaqqittussanngorpoq. Ataasinngorpat Sisimiuni atuarfiit ammaqqissapput. Coronali pissutaalluni immikkut maleruagassaqarluni atuarneq ingerlanneqassaaq.

Aasaanerani feeriap kingorna atuarfinnik ammaaqqinniarneq angajoqqaarpassuarnit aarleqqutigineqarpoq. Ernumanissamulli maannamut tunngavissaqanngilaq. Atualeqqinneq isumannaatsumik pisinnaavoq, taamatullu meeqqat ulluinnarnut uteqqinnissaat pingaaruteqarpoq, tamanna meeqqat inuunerissaarnerannut aamma tunngassuteqarmat. Nakorsaanerup Henrik L. Hansen-ip tamanna naqissuserpaa.

”Atuarneq imminermini tunillaassuuttoqarnissaanut aarlerinaateqanngilaq. Atuartut imminnut qanillinngippata aarlerinartoqassanngilaq. Meeqqalli atuarfiup avataani peqatigiippata, tamatumani tunillaassuuttoqarnissaanut aarlerinartoq atuarfimmisulli issaaq, imaluunnit suli annertunerulluni. Atuarfiup avataani pisunut tunillaassuunnermi misissuinissamut periarfissaqanngilagut, meeqqat sumiissimanersut ilisimassannginnatsigu.” taama oqarpoq Henrik L. Hansen.

Nunatsinni nakorsaaneqarfik Qeqqata Kommunialu suleqatigiillutik malittarisassiorsimapput, taakkualu qulakkiissavaat atuartut imminnut qanillinaveersaarnissaat, taamaalillutik sapinngisaq tamaat tuniluuttoqarnissaa pinaveersaarniarlugu.

Malittassani pingaarnerit ukuupput:
  • 1.-5.klassit atuarfinni atuartinneqartassapput, 6.-10.klassillu angerlarsimaffimminniit atuartinneqartassallutik. Marlunngorpat 6.-10. klasse angerlarsimaffimminni atuartinneqarnissaannut ilitsersuutit nassiunneqassapput.
  • Atuartut holdikkaarlutik atuariartortassapput. Taamaaliornermi atuartut atuartitsiviup iluaniittut ikilisarneqassapput.
  • 1.-5. klasse ataasinngorpat 16. august atualissapput.
  • 6.-10. klassit marlunngorpat 17. august atualissapput.
  • Atuartut nikerartunik atuariartortarfeqarlunilu anitsiartarfeqassapput.
  • Atuartut, inimi atuartitsivimmi ullup qeqqasiortassapput, tamatumani neriffiup nalaani atuartunut allanut akulerutinnginnissaq pinaveersaarniarlugu.
  • Anitsiarfiit aalajangersimasumik aaqqinneqassapput, taamaalilluni atuartut atuaqatitik kisiisa anitsiaqatigisassallugit.
  • Atuartut imminnut qanillinaveersaassapput, assatillu errortukulallugit
  • Atuartut nualluummut ersiutillit angerlarsimaannassapput

Qeqqata Kommuniata malittarisassat tamakkiisut Sisimiuni atuartuutilinnut paasissutissiissutigissavai.