12 – 15-inik ukiulinnik akiuussutissiinissamut neqeroorut iluatsitsiviulluartoq

akiuussusiineq Sapaatit akunneranni matumani 12 – 15-inik ukiulinnut akiuussutissanik kapuisoqarsinnaalerpoq. Ippassaq Nuummi siunnerfigineqartut 50%-ingajaat neqeroorummut akuersillutik kapitipput.

”Nuummi orniguttorpassuaqartoq takullugu nuannaarutigisorujussuuara, neriuppungalu nunap sinnerani taamatut ingerlaannartoqarumaartoq”, nakorsaaneq Henrik L. Hansen oqarpoq nangillunilu, ”maanna tuniluuttoqarneranut atatillugu takusinnaavarput tunillatsittut amerlanersaat akiuussutissinneqarsimanngitsut, taamaattumillu kapitinnissaq kaammattuutigiinnassavara, tamanna inuiaqatigiinni tuniluuttoqannginnissaata qulakkeernissaanut sakkussatut pitsaanerpaammat.”

Ullumi nal. 15.30 tungaanut, Kangerlussuarmi 14.00 tungaanut aamma Sisimiuni nal. 15.00 tungaanut akiuussutissanik kapuisoqarpoq.

Nuummi sapaatit akunnerata tulliani akiuussutissanik kapuineq ingerlateqqinneqassaaq – ilaatigut marlunngornermi 17. aggustimi GU-mi inuusuttunut immikkut ittumik neqerooruteqartoqarneratigut – tullianillu sisamanngornermi 19. aggustimi USK-imi neqerooruteqartoqaqqissaaq, tassanilu innuttaasut 22. juulimi siusinnerusukkulluunniit kapitissimasut kapiteqqinnissaat, aammalu 12-inik ukioqalereersimasut tamarmik siullermeerlutik kapitinnissaat neqeroorutigineqassalluni. Kapitinnissamut periarfissat pillugit corona.nun.gl aqqutigalugu malinnaagit.