Nunami namminermi angerlarsimaffeqanngitsunik oqallittarfittaap angerlarsimaffeqanngitsut pillugit suleqatigiinneq nukittorsassavaa

Naalakkersuisut siunertaraat, angerlarsimaffeqannginnerup annikinnerpaaffimmiitilernissaa. Tapersersuinikkut ilitsersuinikkullu pinaveersaartitsisoqassaaq innuttaasut najukkaminnik annaasaqannginneranni angerlarsimaffeerutinnginnerannilu.

Pineqartumi suleqatigiinneq nukittorsarumallugu, Naalakkersuisut nunami namminermi angerlarsimaffeqanngitsunik oqallittarfittaamik pilersitsiniarput. Angerlarsimaffeqanngitsunik qitiusumik sullissisunik imaluunnit innuttaasunik angerlarsimaffeeruteriaannaasunik sullissisunik, oqallittarfik inuttaqassaaq.

Nunami namminermi angerlarsimaffeqanngitsunik oqallittarfittaaq pillugu Isumaginninnermut Sulisoqarnermullu Naalakkersuisoq Mimi Karlsen ima oqaaseqarpoq: ”Pingaaruteqarpoq inuit innuttaasunik inuuniarnermikkut ajornartorsioqqajaasunik sullissisut katersornissaat. Naalakkersuisut inuit sullissisut tusarnaarusuppaat, taakkulu angerlarsimaffeqanngitsut ikilisinneqarnissaannik, angerlarsimaffeqariinngitsunillu ikiuinissamut siunnersuutinik piviusorsiortunik saqqummiissapput. Tamatuma saniatigut  oqallittarfiup siunertaraa oqalliseqatigiinnissaq isumassarsisitaanissarlu, ajornartorsiutimmi arlariit assigiipput”.

Nunami namminermi angerlarsimaffeqanngitsunik oqallittarfittaap, kommunet angerlarsimaffeqanngitsullu pillugit suliniuteqartut misilittagaannik paarlaasseqatigiinnissaq  tapersersuiffigissavaa. Oqallittarfiuttaaq siunertaraa Naalakkersuisunik siunnersuinissaq ilitsersuinissarlu, angerlarsimaffeqanngitsunik apeqqutinut atatillugu.

Oqallittarfik inunnik ulluinnarni allaffissornermilu angerlarsimaffeqanngitsunik sullissisunik inuttaqarpoq. Oqallittarfik inuttaqartinneqassaaq nuna tamakkerlugu angerlarsimaffeqannginnermut ajornartorsiutaasunik ilisimannilluartunik. Oqallittarfimmi ilaasortat pisinnaaffimminni sammisartakkaminnik ilanngussisinnaapput, angerlarsimaffeqanngitsunullu tunngassuteqartunut suleqatiginnittuussallutik. Oqalliffik kommuneneersunit, Kofoed Skolemeersunit, Ilisimatusarfimmeersunillu ilaatigut ilaasortaqassaaq.

Oqallittarfimmi ataatsimeeqqaartoqassaaq 2021-mi ukiakkut, tassanilu ajornartorsiutit siunissami suliassat sammineqassallutik.

 

Annertunerusumik paasisaqarfissaq:

Isumaginninnermut Sulisoqarnermullu Naalakkersuisoqarfik
Anders Kok Hansen: ankh@nanoq.gl