Sillimmateqarnerup pitsanngornera Kommune Kujalliup sulineranut toqqissisimanarnerulersitsissaaq

Aningaasaqarnermut Nunamullu Namminermut Naalakkersuisoqarfiup juli 2021-p aallartinnerani Kommune Kujallermit kommunip aningaasanik tiguinnarianik uninngasuutaanik sillimmatit tatineqariartornerat iliuuseqarfigiumallugu, aningaasanik tiguinnarianik taarsigassarsiaasa annertusineqarnissaanut akuersissummik kommunip qinnuteqaataa tiguaa.

Kingorna naalakkersuisoqarfiup kommunillu atorfilittaasa qanimut ammasumik oqaloqatigiillutik, Kommune Kujalliup aningaasaqarnikkut ilungersornartumik inissisimanera paaseqatigiissutigaat. Tassunga atatillugu Kommune Kujalliup siunissami suliffeqarfiup aaqqissuussaanerata, aaqqissuussaanikkullu nalimmassaanissamut suliniutit, ukiuni tulliuttuni aningaasaqarnikkut toqqammavianik nukittorsaaqqinnissamik siunnerfilimmik kommunip anguniagaqarneranik nassuiaateqarpoq.

Tamanna tunuliaqutaralugu Kommune Kujalliup ulloq 29. juli 2021 aallarnerfigalugu aningaasanik tiguinnarianik taarsigassarsiami 25 mio. kr.-t angullugit annertuliisinnaanera Naalakkersuisut akueraat.

Aningaasanik tiguinnarianik taarsigassarsiat piffissami ungasinngitsumi annikillineqarnissaat, ungasinnerusorlu isigalugu aningaasanik tiguinnarianik pituttugaanngitsunik sillimatinik taarserneqarnissaa naatsorsuutigineqarpoq.

Aningaasanik tiguinnarianik sinaakkutit kommunip aningaasanik tiguinnarianik uninngasuutinik sillimmatinik nukittorsaanermut atorneqassasoq isumaqatigiissutigineqarpoq.

Anguniakkat takorluukkallu piviusunngortinneqarnissaat annertunerusumik qulakkeerumallugu piffissami aggersumi kommunip Aningaasaqarnermullu Naalakkersuisoqarfiup akornanni annertusisamik ingerlaavartumillu qanimut oqaloqatigiittarnissaq, kommunip naalakkersuisoqarfiullu isumaqatigiillutik naatsorsuutigaat.

Aningaasaqarnermut Nunamullu Namminermut Naalakkersuisoq Asii Chemnitz Narup ima oqaaseqarpoq:

”Kommune Kujallermi pissutsit inissisimanerat paasisinnaallugulu qanimut malinnaaffigaarput. Kommune Kujalliup nammineerluni ilungersornartunut iliuuseqarnera, kommunillu aningaasaqarnermi inissisimanerata siunissami nukittuunngortinnissaanut pimoorussinera iluarisimaarparput. Aningaasanik tiguinnarianik sillimmatit nukittunerulersinneqarneratigut, unammilligassat iliuuseqarfiginissaannut eqqissilluni sulinissamut toqqammavissat pilersinneqartoq naatsorsuutigineqarpoq.”


Borgmester Stine Egede ima ilassusiivoq:

”Aningaasaqarnermut Naalakkersuisoqarfimmut saaffiginnissuterput akuersaartumik paasinnittumillu tiguneqarnera nuannaarutigaarput. Kommune Kujallermi aningaasatigut sillimmatigissaarnerulernissamut periarfissinneqarnerput, ulluinnarni ingerlatsinitsinnik patajaannerulersitsissaaq. Minnerunngitsumillu Aningaasaqarnermut Nunamullu Namminermut Naalakkersuisumik Asii Chemnitz Narupimik oqaloqatiginninnitta Naalakkersuisuni paasinninnermik periarfissiinermillu nassataqarnera nuannaarutigaarput. Kommune Kujallermi ajornakusoornartumik aningaasaqarnikkut inissisimanerput siornatigulli ilisimaneqareerpoq. Sillimmateqalernerput sukannersumik aqutsinitsinnik unitsitsissanngilaq. Aningaasaqarnikkut sukannersumik aqutsinitta nangittumik ingerlanneqarnissaa paasineqaqquarput.”


Inussiarnersumik inuulluaqqusilluta

Asii Chemnitz Narup, Aningaasaqarnermut Nunamullu Namminermut Naalakkersuisoq

Stine Egede, Borgmester Kommune Kujalleq


Attavigisassaq: Niels Kristian Skou (Aningaasaqarnermut Naalakkersuisoqarfik) nisk@nanoq.gl