Akiliisinnaanermut sillimmateqarneq Avannaata Kommuniata 20 mio. koruuninik qaffappaa


Aningaasaqarnermut Nunamullu Namminermut Naalakkersuisoqarfiup ulloq 23. juni 2021 Avannaata Kommunianit, kommunip aningaasanik tiguinnarianik uninngasuutaanik sillimmatit tatineqariartornerat iliuuseqarfigiumallugu, aningaasanik tiguinnarianik taarsigassarsiaasa annertusineqarnissaanut akuersissummik kommunip qinnuteqaataa tiguaa. Immikkut taaneqarput inunnik isumaginninnermi pilersuiniarnermilu sulianut attuumassuteqartunut aningaasartuutit qaffakkiartorneri ilungersornarsiartormata.

Kingorna naalakkersuisoqarfiup kommunillu atorfilittaasa qanimut ammasumik oqaloqatigiillutik, Avannaata Kommuniata aningaasaqarnikkut ilungersornartumik inissisimanera paaseqatigiissutigaat. Tassunga atatillugu Avannaata Kommunia iliuusissatut pilersaarutissamut missingersuummik, ukiuni tulliuttuni aningaasaqarnikkut toqqammavigineqartup nukittorsaaqqinnissamik siunnerfilimmik suliaqarpoq.

Tamanna tunuliaqutaralugu Avannaata Kommuniata ulloq 29. juli 2021 aallarnerfigalugu aningaasanik tiguinnarianik taarsigassarsiami 20 mio. kr.-t angullugit annertuliisinnaanera Naalakkersuisut akuersissutigaat.

Aningaasanik tiguinnarianik taarsigassarsiat piffissami ungasinngitsumi annikilliartortinneqarnissaat, ungasinnerusorlu isigalugu aningaasanik tiguinnarianik pituttugaanngitsunik sillimmatinik taarserneqarnissaa naatsorsuutigineqarpoq.

Aningaasanik tiguinnarianik sinaakkutit kommunip aningaasanik tiguinnarianik uninngasuutinik sillimmataanik nukittorsaanermut atorneqassasoq isumaqatigiissutigineqarpoq. Avannaata Kommuniata ukiuni tullerni siunnerfeqarluartumik suliniarnermigut aningaasanik tiguinnarianik taarsigassarsiatut akuerineqartut piffissalerneqarnerata qaangiunnerani taartissanik naammattunik aningaasanik uninngasuutinik sillimmateqalernissaa naatsorsuutigineqarpoq

Anguniakkat takorluukkallu piviusunngortinneqarnissaat annertunerusumik qulakkeerumallugu naatsorsuutigineqarpoq piffissami aggersumi kommunip Aningaasaqarnermullu Naalakkersuisoqarfiup akornanni annertusisamik ingerlaavartumillu qanimut oqaloqatigiittarnissaq pillugu, kommunip naalakkersuisoqarfiullu isumaqatigiissutigaat.

Aningaasaqarnermut Nunamullu Namminermut Naalakkersuisoq Asii Chemnitz Narup ima oqaaseqarpoq:

”Ukiup 2020-p 2021-llu nalaatsinerluffiulluni nalorninartuunera tamatta nalaapparput.

Avannaata Kommuniata ukiuni aggersuni aningaasaqarnermi naleqqussaanissamik pisariaqartitsisoq naalakkersuisoqarfiup kommunillu oqaloqatigiinnerisa ersarissisippaat.

Aningaasanik tiguinnarianik sillimmatit annertusineqarneratigut, kiisalu kommunip naalakkersuisoqarfiullu siunissami annertuumik isumasioqatigiillutillu ikioqatigiinnissaannik isumaqatigiissuteqarnikkut, kommunip aningaasaqarnikkut toqqammaviata nukittorsarnissaanut, kommunillu aningaasaqarnikkut nukittuumik inissisimalernissaanut ineriartornissamut siunnerfiliisoqarpoq.”


Borgmester Palle Jeremiassen ima ilassusiivoq:


”Ingammik isumaginninnermut immikkoortumi, kiisalu pilersuinermut sullissinermut atatillugu aaqqissuussaanikkut ilungersornartut Avannaata Kommuniata aningaasaqarneranut sunniuteqarput, peqatigisaanilli suliffissaaleqinermut isertitanullu tunngatillugu pitsaasumik ineriartortoqarneranik takussutissaqarpoq. Taamaammat kommunip aningaasanik uninngasuutinik sillimmataasa nukittorsarneqarnerat kommunimi nuannaarutigaarput, taamaaliornikkullu maanna nalimmassaanissamik suliassaq eqqissilluni suliarineqarsinnaalerpoq.”





Inussiarnersumik inuulluaqqusilluta



Asii Chemnitz Narup, Aningaasaqarnermut Nunamullu Namminermut Naalakkersuisoq


Palle Jeremiassen, Borgmester Avannaata Kommunia





Attavigisassaq:

Niels Kristian Skou (Aningaasaqarnermut Naalakkersuisoqarfik)
Toqq/direkte 345177
nisk@nanoq.gl