Qaqortumi mittarfissaq pillugu Simon Simonsenip ammasumik allakkiaanut akissut

Asasara Simon,

Qaqortumi mittarfissaq pillugu ammasumik allakkiannut qujanaq. Oqallinneq tamatsinnut tunngassuteqarluni pingaaruteqarpoq, taamaattumillu mittarfissat pillugit isertuannginnissaq Naalakkersuisut pingaartippaat. Oqallinnerup matumap piviusorpalaartumik tunngaveqarnissaa pingaaruteqartorujussuuvoq. Isornartorsiuisoqarsinnaavoq, isornartorsiuissagaannili piviusumik tunngaveqartuartariaqarluni. Tamatumunnga isumaqatigiittugut qularinngilluinnarpara. Taamaattumik attaveqatigiinnermut Naalakkersuisuunivit nalaani mittarfissat pillugit suliniut Inatsisartunut nammineerlutit 2018-imi saqqummiunnikuusat, Siumukkut Demokraatillu taasinerisigut Inatsisartunit akuersissutigineqarnikuusoq pillugu, akissut manna iluatsillugu mittarfissat pillugit paasissutissanik pingaarutilinnik saqqummiussilaarniarpunga.

Nuummi Ilulissanilu mittarfissanut ilaannakortumik aningaasalersuinissamut, Qaqortumilu mittarfissamut tamakkiisumik aningaasalersuinissamut Naalakkersuisut Kalaallit Airports A/S-imut 2,1 mia. koruuninik aningaasaliinissaannut, Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaat nr. 4, 22. november 2018-imeersumi pisinnaatinneqarput. 2021-p qiteqqunnerata tungaanut Namminersorlutik Oqartussat sinnerlugit Naalakkersuisut, Kalaallit Airports Holding A/S-imut aningaasaleeqataassutsinik 1,472 mia. koruuninik akiliuteqarput. Taamaalilluni aningaasaleeqataassutsinik akiliutissat 0,63 mia. koruunit suli aningaasaliissutigineqanngillat, taakkulu siuliani taaneqarluni sanaartornissamut inatsit naapertorlugu ukiuni tulliuttuni aningaasaliissutigineqassallutik.

Aappassaaneerinermi saqqummiunneqarluni allannguutissatut siunnersuutip kingunerisaanik, ingerlatseqatigiiffiit pingasut KAIR maanna ingerlataraat:
  • Kalaallit Airports Holding A/S, Namminersorlutik Oqartussanit tamakkiisumik pigineqartoq.
  • Kalaallit Airports International A/S, Nuummi Ilulissanilu mittarfiliortut. Naalagaaffik ingerlatseqatigiiffimmut piginneqataalluni 33,3 procentimik piginneqataavoq, Kalallit Airports Holding A/S-ilu (taamaalillunilu Namminersorlutik Oqartussat) 66,6 procentinik piginneqataalluni.
  • Kalaallit Airports Domestic A/S, Qaqortumi mittarfiliortussaq. Ingerlatseqatigiiffik taanna Kalaallit Airports Holding A/S-imit (taamaalillunilu Namminersorlutik Oqartussanit) tamakkiisumik pigineqarpoq.
Immikkut siulersuisoqarlutik, ilaatigullu piginnittut assigiigatik ingerlatseqatigiiffiit immikkoortut taakku pingasuusut katitigaanerisa kingunerisaannik, Kalaallit Airports International A/S-ip aamma Kalaallit Airports Domestic A/S-ip akornanni aningaasartuutinik nuussisoqarsinnaanngilaq.

Mittarfissat pillugit suliniutip kingunerisaanik, Nuummi Ilulissanilu mittarfiliornerni aningaasartuutaanerusussat Kalaallit Airports International A/S-ip nammineerluni matussutissarsiortussaavai. Naalakkersuisut nittartagaanni Mittarfissat pillugit suliniut pillugu nassuiaammi allassimasutut, tamanna taarsigassarsitinneqarnikkut pissaaq.

Taamaalilluni Nuummi Ilulissanilu mittarfiliornerni aningaasartuutit annerulernerat, Nunatta Karsianit toqqaannartumik aningaasartuuteqarnerunissamik kinguneqassasoq Naalakkersuisut naatsorsuutiginngilaat. Taarsigassarsinermi toqqaannanngitsumik sunniutaasut nassuiaammi allassimapput.

Qaqortumi mittarfissamut tunngatillugu inissisimaneq allarluinnaavoq. Kalaallit Airports Domestic A/S-ip Qaqortumi mittarfiliornissaa Nunatta Karsianit tamakkiisumik aningaasalersorneqartussaavoq. Mittarfiliassap siullermeertumik neqeroortitsissutigineqarnerani neqeroorutit missingersuutinit akisunerummata, neqeroortitsinermi atortussat nutaat suliarineqarput. Aappassaanik neqeroortitsinermi mittarfik illutassaallu neqeroortitsissutigineqarput. Aappassaanik neqeroortitsinermi neqeroorutit missingersuutinit aamma akisunerusut ajoraluartumik paasinarsivoq.

Neqeroortitsinermi neqeroorutit missingersuutinit akisuneruneri, Kujataani angallannikkut ajornartorsiutit aaqqiiviginiarneqarnissaannut allannguinngilaq. Aaqqiivigineqarnissaa Nunatta Karsianit akilerneqassaaq, taamaattumillu Qaqortumi mittarfiliornissami aningaasaliissutit allat suut sunnerneqarnersut allatut ajornartumik isiginiarneqartariaqarpoq. Kikkut tamat eqqarsaatigalugit tamanna pinngitsoorneqarsinnaanngilaq. Aningaasat siunertamut ataatsimut atugassanngortissimagaanni, siunertanut allanut ilutigisaanik atorneqarsinnaanngillat. Aningaasaliineq siunissami imminut akilersinnaagaluarpalluunniit, allanut sunniuteqarsinnaavoq. Nipituumik oqaatigisariaqarpoq. IMAANNGILAQ Qaqortumi mittarfiliortoqarnissaa tapersersorneqanngitsoq. Kisianni eqqortumik iliortoqassaaq, ima paasillugu, kingunissai pillugit massakkut ersarinnerusumik paasitinneqartariaqartugut.

Taamaattumik periarfissanik assigiinngitsunik tikkuussisinnaasunik, misissueqqissaarnernik assigiinngitsunik aallartitsivunga. Misissueqqissaarnerit naammasseriarpata saqqummiunneqassapput. Paasissutissanut saqqummiunneqarumaartussanut innuttaasut, kommunalbestyrelsi partiillu eqeersimaassasut naatsorsuutigaara, soorluttaaq Naalakkersuisut kiisalu Inatsisartut aalajangiisinnaaqqullugit paasissutissat Inatsisartunut saqqummiunneqarumaartut. Qaqortumi mittarfissaq taamaatiinnassagipput siunnersuuteqarlutik partiinit saaffigineqarsimannginnama erseqqissaatigissavara. Uani aningaasaqarnermut tunngasut pineqarput, tamannalu pissusissamisuuginnarlunilu pisariaqarpoq. Tamanna inissaqartinneqartariaqarpoq.

Danmarkimi attaveqatigiinnerup ineriartortinneqarnissaanut danskit naalakkersuisui 160 milliarder koruuninik immikkoortitsisimasut usornartut allapputit. Danmarkimut sanilliullugu maani nunatsinni innuttaasumut ataatsimut agguarlugu annertunerujussuarmik immikkoortitsimanerput nuannaarutigisinnaavat. Danmarkimi angallannermi attaveqatigiinnerup ineriartortinneqarnissaanut danskit naalakkersuisuisa 160 milliarder koruuniit taakku immikkoortissimasaat, Danmarkimi innuttaasumut ataatsimut agguaraanni innuttaasumut ataatsimut 28.000 koruunit missaat naligaat. Nuummi, Ilulissani Qaqortumilu mittarfinnik ineriartortitsinissaannarmut Namminersorlutik Oqartussat 2,1 milliarder koruunit immikkoortitaat, nunatsinni innuttaasumut ataatsimut agguaraanni innuttaasumut ataatsimut 37.500 koruunit missaat naligaat. Nunatsinni umiarsualiviit, mittarfiit, qulimiguulinnut mittarfiit il.il. iluini attaveqatigiinnermut tunngatillugu suliniutit allat taakku qaavinut ilanngutissavagut. Taamaattumik malinnaalluarpugut, attaveqatigiinnerlu nunami tamarmi ineriartortinneqassasoq politikkikkut isumaqatigineqarluarluni.

Naggasiullugu erseqqissaatigissavara, Kujataani angallanneq Naalakkersuisut pingaartimmassuk. Taamaattumik Kommune Kujallermi kommunalbestyrelsip ataatsimeeqatiginissaa pingaartittorujussuuara. Aggustip 23-anit 30-ata tungaanut pilersaarutaasumik Kujataaniinnissanni ataatsimiinneq ingerlanneqarsinnaassasoq naatsorsuutigaara. Borgmesterip allatseqarfia peqatigalugu ataatsimiinnissaq pilersaarusiorneqassaaq.

Kaammattuutigissavara ”Mittarfiliortiternerit aamma Kalaallit Airports International A/S-ip aningaasaatinut aningaasaliiffigeqqinneqarnissamut pisariaqartitsinera pillugu nassuiaat” ilanngussatut ilanngussara, ataatsimiinnissaq sioqqullugu atuassagit.

Paasissutissat suulluunniit ammasut tulliuttumi atuarsinnaavatit Mittarfiit ataatsimoortitat - Naalakkersuisut.

Inussiarnersumik inuulluaqqusillunga

Naaja H. Nathanielsen