Kommuneqarfik Sermersooq nuummi innuttaasunik inissianik attartortitsinera

Kommuneqarfik Sermersooq nuummi innuttaasunik inissianik attartortitsinera pillugu suliaq Peqqissutsimut Naalakkersuisup suliassaqarfiinut inissisimavoq

Tusagassiorfik nittartakkami Sermitsiaq.AG-imi 28. juli 2021 Kommuneqarfik Sermersooq nuummi innuttaasunik inissianik attartortitsinera pillugu Naalakkersuisut nakkutilliineranut tunngasoq ilanngutassiaq saqqummiunneqarpoq. Ilaatigut taaneqarpoq Aningaasaqarnermut Nunamullu Namminermut Naalakkersuisoq ’pappialatigut’ nakkutilliinermut suliaq maanna ingerlanneqartoq suliassaqarfiata ataaniittoq. Tassunga atatillugu Peqqissutsimut Naalakkersuisoq ima nalunaarutissaqarpoq.

Naalakkersuisut 23. april 2021-imi atuutilerneraniit arlalinnik suliassaqarfinnik allannguisoqarpoq. Ilaatigut Nunamut Namminermut Immikkoortortaqarfik Aningaasaqarnermut Naalakkersuisoqarfimmut nuunneqarpoq.

Aningaasaqarnermut Nunamullu Namminermut Naalakkersuisoq aamma Naalakkersuisut sinneri aallaqqaataaniilli suliamut attuumavallaarnermut tunngatillugu ajornartorsiut eqqumaffigivaat, erngerlutillu Kommuneqarfik Sermersooq nuummi innuttaasunik inissianik attartortitsinera pillugu suliassaqarfik nuunneqarnissaanut ilitsersuummik suliaqartitsipput.

“Attuumassuteqarpallaarsinnaanermut tunngatillugu Aningaasaqarnermut Nunamullu Namminermut Naalakkersuisumut ilitsersuut” 14. maj 2021 ullulerneqarsimasumi takuneqarsinnaavoq nakkutilliinermut suliaq suliassaqarfittut Aningaasaqarnermut Naalakkersuisumiit Peqqissutsimut Naalakkersuisumut nuunneqarsimasoq.

Ilanngutassiami taaneqarpoq tusagassiortup Nakkutilliisoqarfik imaluunniit Aningaasaqarnermut Nunamullu Namminermut Naalakkersuisoq oqaaseqartissinnaasimanngikkai. Tassunga tunngatillugu nalunaarutigineqarsinnaavoq tusagassiortup saaffiginnissutaa tunniussiffissamut killigititamut qaningaarmat, piffissarititap iluani apeqqutigineqartut akineqarsinnaasimanatik.

Annertunerusumik paasisaqarusunnermi saaffigineqarsinnaavoq, Klaus Georg Hansen, Nakkutilliisoqarnermi pisortaq, oqarasuaat +299 34 51 11, mail kgh1@nanoq.gl