Issittup imartaani aalisarnermut isumaqatigiissut atuutilerpoq

Issittup imartaani (CAOFA) killilersorneqanngitsumik nalunaarsorneqanngitsumillu aalisanginnissamut nunat tamalaat akornanni isumaqatigiissut, Canadamit, Danmarkimit, (Kalaallit Nunaat Savalimmiulu (DFG) sinnerlugit), EU-mit, Island-mit, Japan-mit, Kina-mit, Norge-mit, Rusland-imit, Korea Kujalleq-mit aammalu USA-mit novemberimi 2017-mi isumaqatigiissutaasoq junip 25-iani 2021-imi atuutilersinneqarpoq.

Siullertut isumaqatigiissutip siunertaraa, issittup imartaani aalisagaqassutsinik ilisimasat piujuartitsinissamut aallaaviusussat qulakkeeqqaartinnagit aalisartoqannginnissaa, taamaasilluni aalisagaqassutsimik atorluaanissaq piujuartitsinissamik aallaaveqartussaq ingerlanneqarsinnaaniassammat. Tassungalu atatillugu ilisimatuussutsikkut ataatsimiititaliamik pilersitsisoqarsimavoq isumaqatigiissuteqartunut tapersersuillunilu innersuussisartusamik ilisimatuussutsikkut misileraalluni aalisarnermik ataatsimoorluni pilersaarummik ineriartortitsinissamik aammalu aalisagaqassutsip qanoq inissisimaneranik takussutissanik pilersitsinissaq, peqatigiiffiit pioreersut il. il. suleqatigineratigut.

Naalagaaffeqatigiinnerup isumaqatiginninniarnerni aallartitaani (DFG) Kalaallit Nunaat isumaqatiginninniarnerni siuttutut 2017-imiilli inissisimasuuvoq. Aallartitat Kalaallit Nunaani ICC-miit aammalu Pinngortitaleriffimmiit peqataaffigineqartarput aammalu Savalimmiormiut Danskit Nunanut allanut Kulturikkut politikkeqarnermi Ministeriaqarfiat aqqutigalugu aallartitaqarput. Isumaqatigiissut Kalaallit Nunaani Aalisarnermi Piniarnermillu Naalakkersuisoqarfiup ataaniippoq.

Isumaqatigiissutip suliarinerani Kalaallit Nunaanniit annertuumik ukkatarineqarsimavoq, nunap inoqqaavisa peqataatinneqarnissaat aammalu nunap inoqqaavisa ilisimasaasa isumaqatigiissutip pilersinneqarnerata ingerlanerani ilanngunnissaat. Taakkua ilisimasat ilisimatuussutsikkut ilisimasat assigalugit ilanngunneqarnissaat pingaartinneqarluinnarsimavoq.

Isumaqatigiissut naapertorlugu, isumaqatigiissuteqartut akornanni minnerpaamik ukioq allortarlugu ataatsimiinnerit inerlanneqartassapput. Isumaqatigiissutip atuutilernerata kingorna ataatsimiinnissaq siulleq naatsorsuutigineqarpoq 2022-imi ukiup affaata siulliup ingerlanerani korea-mi ingerlanneqassasoq, apeqqutaatinneqassaaq Covid19-ip angallannikkut killilersuisitsinera imaluunniit periarfissaq siulleq atorneqarumaarpoq.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl