Tammajuitsussanik piniarneq aggustip aallaqqaataani aallartissaaq

Tammajuitsussanik Juulimi piniartoqassanngitsoq pillugu aalajangiinerup tusagassiorfinni illuinnarsiortumik sammineqarneranut atatillugu Aalisarnermut Piniarnermullu Naalakkersuisoqarfik matumuuna makkunannga erseqqissaateqassaaq. Naalakkersuisoqarfik tusarniaanerup, kingusinaalaartumik maajip naaneraniit sapaatip akunnerini tallimani ingerlanneqartup, ingerlanerani akissuteqaatinik arlalissuarnik tigusaqarnikuuvoq, taakkulu Naalakkersuisut tusarniaanermut nittartagaani takuneqarsinnaallutik. Tammajuitsussanik aaqqissuussisartut, inuussutissarsiutigalugu sunngiffimmilu piniartut, KNAPK kiisalu Qeqqata Kommunia tamarmik tusarniaanermut akissuteqarnikuupput.

Tusarniaanermut akissuteqaatit malillugit pingaartumik Juulimi tammajuitsussanik piniarneq assigiinngitsorujussuarnik isumaqarfigineqarpoq. KNAPK, Qeqqata Kommunia kiisalu inuussutissarsiutigalugu sunngiffimmilu piniartut Juulimi tammajuitsussanik piniartoqarnissaa assut akerlerivaat. Inuussutissarsiutigalugu sunngiffimmilu piniartut Juulimi tammajuitsussanik piniarneq akornusiinerujussuartutut isigivaat isumaqarpullu piniagassat tammajuitsussanik piniarnerup Juulimi ingerlanneqartup nalaani nunap timaanut ungasissumut qimaatinneqartartut.

Juulimi tammajuitsussanik piniarneq Qeqqata Kommunianiit eqqumaffigineqartorujussuuvoq inassuteqaaminnilu piumasarivaat inuussutissarsiutigalugu, sunngiffimmi aamma tammajuitsussanik piniarnerit tamarmik Aggustip aallaqqaataani ataatsikkut aallartinneqassasut. Inuussutissarsiutip ineriartornissaa akerlerineqanngilaq, kisianni inuussutissarsiutigalugu sunngiffimmilu piniartunut kinguneqarnerlunngitsumik, taakkumi piniarfinni pineqartuni tammajuitsussanik piniartoqalinnginnerani piniartuummata. Taakkuupput tusarniaanermut akissuteqaatit tammajuitsussanik piniarnerup Aggustip aallaqqaataani aatsaat aallartinnissaanut tunngaviliisut, inuussutissarsiutigalugu sunngiffimmilu piniarnerup aallartiffiani. Naalakkersuisoqarfik aalajangeereernerup kingorna taammajuitsussanik piniarnissamut Aggustip aallaqqaataani aallartittussamut akuersissutinik huntrilikkaanik nassiussaqarnikuuvoq.

Tammajuitsussanik piniarnermik aaqqissuussisartut suli aalajangiisoqanngitsoq pillugu ilisimatinneqartuaannarnikuupput taamatullu aalajangiisoqartinnagu akuersissutinik nassiussisoqassanngitsoq. Tammajuitsussanik piniariat aalajangiisoqannginnerani Kangerlussuarmut tikittut pingasuupput taamaammallu taakkua tammajuitsussanik piniariarsinnaasimanngillat. Nunarsuarmi piniarfiit pitsaanerpaat maani Kalaallit Nunaanni inissisimasuupput, taamaammat soqutigisaqaqatigiit tamarmik assigiimmik periarfissaqarnissaat pingaaruteqarpoq. Soqutigisaqaqatigiit akunnerminni aporaannerisa millisinneqarnissaat imaluunniit sapinngisamik pinaversaartinneqarnissaat Naalakkersuisoqarfimmiit anguniarneqartuarpoq

Naalakkersuisoqarfiup tamakkiisumik nalilersuineq tunngavigalugu aqutsineq ingerlappaa immikkut soqutigisallit pinnagit, tamannalu Juulimi tammajuitsussanik piniartoqannginnissaa pillugu aalajangiinermi erserpoq. Kalaallit Nunaanni tamani inuussutissarsiutigalugu sunngiffimmilu piniartut taamaalillutik naatsorsuutigisinnaavaat, Aggustip aallaqqaataani piniarfinnut allaniit piniarfigineqareersimanngitsunut tuttunniarsinnaassasut umimmanniarsinnaassallutillu. Ilutigalugu tammajuitsussanik piniartut naatsorsuutigisinnaavaat Kalaallit Nunaanni tammajuuitsussanik piniarneq Aggustip aallaqqaataani aallartissasoq.

Tammajuitsussanik piniarnermik aaqqissuussisartut inuussutissarsiutigalugu sunngiffimmilu piniartunut sanilliullugit ikinnerussuteqangaatsiartut qanoq isumaqarfigissanerpaat, tammajuitsussanik piniarnerit qaammammik kingulliullutik inuussutissarsiutigalugu sunngiffimmilu piniarneq aallartereersorlu aallartissaagaluarunikku.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut apn@nanoq.gl imaluunniit AC-Fuldmægtig Nuka Møller Lund-mut numl@nanoq.gl saaffiginnittoqarsinnaavoq.