Avannaani tunillatsittut nutaat 12-it

Avannaani misissuinernit tunillatsissimasut nutaat paasineqarput, Upernavimmi 4-t Tasiusamilu 8-t. Tunillatsissimasunik misissuineq suli ingerlanneqarpoq, tunillatsissimasullu angerlarsimaffimminni mattusimapput.

Akissutisinissamik utaqqineq

Misissukkat tamarmik Ilulissani misissoqqissaarneqartussaasimapput, angallannermili pissutsit assigiinngitsut pissutigalugit, misissugassanik misissueqqissaarnissaq ilimagisamit sivisunerusimavoq.

Tunillatsissimasut tamarmik nakorsaaneqarfimmit attavigineqareerput, tunillatsisimasinnaasunillu allanik politiinit suli paasiniarneqarput. Massakkumut ilimanarsivoq tuniluunneq tuniluuttumit ingerlaartumit pisuunera, kisianni inaarutaasumik inerniliisoqartinnagu tunillaassuunnermik paasiniaanernit nalunaarusiat tamarmik utaqqineqassapput.

Tunillatsissimasunut qanimut attaveqarsimasut tamarmik Corona pillugu allatseqarfimmit attavigineqarumaarput, taakkuali amerlanersaat angerlarsimaffimminni matusimalereerput.

Katersuunnerni siaruaassimasoq
Upernavimmi tunillatsittut arlallit tunillanneqarsimanerminnik suli paasisaqaratik aamma tunillaasinnaatillutik kaffillertuniissimapput. Taamaattumik innuttaasut tamarmik kaammattorneqarput maleruaqquneqartunik malinninnissaannik, aamma qanimut attaveqarnissaminnik killilersimaarinninnissaminnik.

Nakorsaaneqarfimmit Paneeraq Noahsen itisiliivoq: ”Kalaallit Nunaanni pisuni amerlasuuni takuarput inuit allanik tunillaasartut suli namminneq tunillanneqarsimanerminnik pasitsaassisimanatik. Tassa taanna ilaatigut patsisaavoq katersuunnissat killilersuiffigineqarnerinut. Matumani inuit pineqartut tassaapput, ataatsimuualaarnerni peqataasut, tunillaassuinermik aallartitsineq ilisimanagu. Inuit angerlarsimaffimminni qanoq iliornissaannik aalajangiisinnaanngikkaluarluta, sakkortunerpaamik kaammattuutigissavarput taamatut katersuuttaqqunagit.”

Akiuussutissinneqarnissaq annikitsuinnarmik peqataaffigineqartoq
Nakorsaaneqarfimmit aamma Kalaallit Nunaanni innuttaasut tamarmik akiuussutissamik kapitinnissaat kaammattuutigineqarpoq. Paneeqqap Upernavimmi pisoq ima oqaluttuarivaa: ”Tunillaassuunneq qiviarutsigu tassani akiuussuserneqarsimanngitsut taakkuunerupput tunillatsittartut aammali allanik tunillaassuisuusut. Taamaattumik innuttaasut tamaasa, sumiiffinni akiuussutissamik neqerooruteqarnermut akuerseqqullugit kaammattorumavagut. Upernavimmi innuttaasut 51 procentiisa missaannaanniittut akiuussuserneqarsimapput, tamanna nunamut tamarmut sanilliukkaanni annikippallaaqaaq.”

Eqqaamajuk
Kikkut tamarmik kaammattorneqarmata angalanissaminnik killilersimaarinninnissaannik aamma sapinngisaminnik qanimut attavigisartakkaminnik killilersimaarinninnissaannik.
Peqatigitillugu kikkut tamarmik ersiutaasinnaasunik eqqumaffiginninnissaat kaammattuutigineqarpoq, nalinginnaasumillu siunnersuutit eqqaamallugit:
- Napparsimaguit angerlarsimaannarit aamma misissortigit
- Assatit asakulakkit assannulluunniit sprit atoruk
- Talippit peqiffianut quersorit tangajorilluunniit
- Assammiinaveersaarit, uluakkut kuniuinaveersaarit pakkutaarinaveersaarilluunniit - timikkut attaveqarnitit killilersimaakkit
- Eqqiaasarnissaq eqqumaffigiuk - angerlarsimaffimmi suliffimmilu
- Qanillinaveersaarit allallu mianersoqqullugit