Nuummi akiuussutissamik kapitinnissaq assut soqutigineqarpoq - ajoraluartumilli amerlasuut kapitinneqaratik angerlartariaqarsimapput

akiuussusiineq Ullumikkut akiuussutissamik kapitinnissaq soqutigineqartorujussuusimavoq. Pilersaarusiornermi taama amerlatigisunut ajoraluartumik piareersimasimanngilagut. Neqerooruteqarnerulli annertusineqarnissaa sulissutigineqarpoq, akiuussutissamillu kapitinnissamut ulluliussat nutaat amerlasuut saqqummiunneqareerput. Ullut uani takukkit.

Nuummi innutaasut COVID-19-imut akiuussutissinneqarnermikkut akiuunnissaminnut piumassuseqarluarput, tamatumanilu innuttaasut pimoorussilluarnerat takullugu assorsuaq pitsaasuuvoq. Taamaattumik inuit taama amerlatigisut suli kapineqanngitsut tiimini arlalinni sialussioreersullu angerlartinnerini kukkussuteqarluta nassuerutigisariaqarparput. Soorunami takkukkaluarluni akiuussutissamik kapitinngitsoorneq naammaginanngilaq. Matumani akiuussutissamik kapuuinermik ingerlatsineq assut ajuusaarutigaarput.

Ullumikkut akiuussuserneqanngitsoortunut kaammattuutigineqassaaq ullut allarpassuit akiuussutissamik kapuuiffissat ulluini takkuteqqinnissaat. Akiuussutissamik kapuuinermi ingerlariaatsip pitsanngorsarnissaa sulissutigineqarpoq, taamaalilluni innuttaasut kapitinnatik angerlaqqinnissaat pinngitsoortinneqarniassammat.

Akiuussutissamik kapitinnissamut ulluliussat uani takuneqarsinnaapput: https://corona.nun.gl/emner/vaccination/vaccinationssted?sc_lang=kl-gl

Taamatuttaaq piffissap kapitiffiusup sivitsornissaa ullullu kapitiffiusussat amerlinissaat sulissutigaarput. Neqeroorutit taakku nutaat ulluni tulliuttuni saqqummiunneqassapput, nutaarsiassat corona.nun.gl-ikkullu malinnaanissaq kaammattuutigaarput

Namminneq piumassutsiminnik sulisunut, sulinngiffeqarnertik sunngiffitsillu atorlugu ikiuussimasunut, qujanarujussuaq.