Aalisartut aalisarnermut inatsisissaq sunniuteqataaffigilluartariaqarpaat

Aalisarnermut inatsisissaq saqqummiunneqarlunilu oqallisigineqalerpat aalisartut sunniuteqaratik tusarnaaginnartutullu inissisimanissaat isigerusunngilakka, taama Aalisarnermut Piniarnermullu Naalakkersuisoq Aqqaluaq B. Egede kujataani juulip aallartissimalernerani angalanermini oqarpoq.

Arlaleriaqaluni erseqqissaavoq aalisartut oqallinnermut sunniuteqaqataanissaat, isumaliutissiissullu saqqummiunneqariarpat, taanna pillugu oqallittoqalerpat partiit isummaminnik oqaatiginnittarumaarmata, namminneerlutik inuussutissarsiuteqartuusutut sunniuteqaqqullugit.

Taamaattumik pingaartittorujussuuara aalisarnermut inatsisissaq pillugu oqallittoqalerpat aalisartut oqallinnermut akuliussimalluartutut peqataallutillu misigisimanissaat.

Aalisarneq pillugu Ataatsimiititaliarsuaq ukiut marluk matuma siorna pilersinneqarpoq. Ataatsimiititaliarsuup sulinerani siunertaq pingaarnerpaaq tassaavoq Aalisarneq pillugu Ataatsimiititaliarsuup aalisarneq pillugu inatsisissamut suliniutissanullu tassunga atasunut allanut aalisarnerup ineriartornissamut periarfissaanut pitsaasumik tapersiisinnaasunik inuiaqatigiillu aalisarnermik pisuussutinillu annertunerpaamik iluaquteqarnissaannut qulakkeerinneqataasinnaasunik inassuteqaateqarnissaa.

Naalakkersuisoqatigiit kissaatigaat ataatsimiititaliarsuup suliani piaartumik naammassissagaa, inuussutissarsiutigalugu aalisartut minnerunngitsumillu innuttaasut inassuteqaataasunut isummersoqataaniassammata. Naalakkersuisullu pissanngatigisorujussuuaat isumaliutissiissutigineqartussaq.

Naatsorsuutigineqarpoq Ataatsimiititaliarsuup isumaliutissiissut aggustimi naammassisimassagaa. Siunertaagaluarpoq Naalakkersuit kingusinnerpaamik 2020-mi upernaakkut ataatsimiinnermi inatsisissatut siunnersuummik aalajangersimasumik saqqummiussaqassasut.

Naalakkersuisunngorlaat naatsorsuutigaat aalisarneq pillugu inatsisissamut nutaamut isumaliutissiissut Inatsisartuni aappagu ukiakkut saqqummiunneqarlunilu oqaluuserineqarumaartoq.

Ataatsimiititaliarsuarmi ilaasortat assigiinngitsumik tunuliaquteqarmata qularinngilara tamat piumasaat tunngavigalugit aaqqiisoqarumaartoq. Taamaattumik pingaaruteqarluinnarpoq Inatsisartut taama pingaaruteqarluinnartigisumik ukiorpassuarnilu atasussamik inatsiseqalernissap aalajangiutinnginnerani aalisartut sumiiffimminni oqaatigisaat aamma tusarniarneqartariaqassasut.

Aalisartunut kaammattuupput kajumissaaruppullu taassavoq oqallinnermut peqataagitsi. Oqaatigineqartoq soqutaarpianngitsutut oqaatigineqarsinnaagaluartoq taamaattoq politikerinut tamanna pingaaruteqarluinnarpoq. Aamma isumaqarpunga ataatsimiititaliarsuup sulinerata nalaani innuttaasut nipangersimasariaqanngitsut, akuunatik nipangersimaannarunik tamanna tamat oqartussaaqataanerinut innarliillunilu navianartuuvoq.

Taamaammat naammassippata pissangassutigivara qanoq sunalu tunngavigalugu sulisimanersut. Eqqumaffigisassanik ulikkaassasoq naatsorsuutigivara.
Naalakkersuisoqarfik peqatigalugu pilersaaruteqarpugut isumaliuutissiissut saqqummeriarpat atuisunillu atuarneqarsimalereerpat isumasioqatigiissitsissalluta,. Pingaaruteqarluinnarpoq saqqummeriarpat innuttaasut tamatumunnga aamma isummersoqataanissaat.

Attavigineqarsinnaavoq Aalisarnermut Piniarnermut Naalakkersuisoqarfimmi pisortaaneq Jørgen Isak Olsen. E-mail: jio@nanoq.gl