Pele Broberg-ip aallarnisaanermik peqatigiiffiup Sakkut Siulittaasua ataatsimeeqatigaa

Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg aamma Napaartoq Petrussen, aallarnisaanermik peqatigiiffiup Sakkut Siulittaasuat junimi naapipput, eqqartueqatigiillutik qanoq ililluni aallarnisaasut Kalaallit Nunaanniittut pitsaanerusunik atugassaqartinneqarnissaat pilersinneqarsinnaanersoq. Sakkut aallarnisaasut peqatigiiffigivaat taakkulu siunertarivaat aallarnisaasut Kalaallit Nunaanniittut pitsaanerusunik sinaakkusersorneqarnissaat sulissutigissallugu aammalu ataatsimut oqariartorfeqarnissaat ataatsimoortumillu nipeqarnissaat taamaasilluni politikerit allallu aalajangiisartunut attuumassutillit aallarnisaasunut ataatsimik saaffiginniffissaqarniassammata.

Naalakkersuisup pingaaruteqangaatsiartutut isigivaa aallarnisaasut Kalaallit Nunaanniittut pitsaasumik atugassaqartinneqarnissaat, aallarnisaasummi nutaaliornissamut piffimmilu suliniutinut pingaaruteqaqimmata, Kalaallit Nunaannilu ineriartornermut pitsaasumut tunngaviliisuusarmata.

Taamaammat Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Brobergip Sakkkut Formandianik inerititaqarfiusumik paasissutissanillu pissarsiffiulluartumik ataatsimeeqateqarneq nuannaarutigivaa, Kalaallit Nunaannilu aallarnisaasut sinaakkutaasa pitsaanerulernissaanik atugassarisaannillu aallarnisaasut peqatigiiffiata suleqatiginissaa qilanaaralugu.

Attavissaq: Naalakkersuisumut allatsi Juno Berthelsen mobil: +299 26 73 72, Email: juno@nanoq.gl