Qaqortumi, Nuummi Ilulissanilu Covid-19-imik tunillatsittoqartoq

Arfininngornermi 10. juli 2021-mi Qaqortumi, Nuummi Ilulissanilu Covid-19-imik tunillatsissimasunik nassaartoqarpoq. Danmarkimiit Qaqortumut tikittup inuk alla tunillassimavaa. Ilulissani Nuummilu tikittut kisimik tunillatsissimasut paasineqarpoq.

Tunillatsissimasut napparsimarulunngillat, maannalu inissiani namminerisamik pigisani mattusimapput.

Angerlarsimaannartussaatitaanermik unioqqutitsisoqarneranut takussutissaqanngilaq, kisiannili tunillatsissimasoq ataaseq silarlunnera pissutigalugu angalangaatsiartariaqarsimavoq, tassanilu tunillaasimasinnaanera ilimagineqartariaqarpoq.

Covid-19 Delta tunillaatiasorujussuaq maanga apuunneqarsimanersoq ilisimanngilarput. Taanna maanna Danmarkimi atuunnerpaavoq, taamaattumillu Delta-mik tunillaassortoqalersinnaanera ilimagineqartariaqarpoq.

Timmisartut aallartut uku ilaaffigalugit angalasimasut Covid-19-imut ersiuteqalernissartik immikkut eqqumaffigissavaat:

  • Marlunngornermi 6. juuli 2021-mi GL 781 Københavnimiit Kangerlussuarmut. Issiavinni række 29-31-mi kiisalu række 41-43-mi issiasut tunillatsissimasunut qaninnerpaasimapput.
  • Marlunngornermi 6. juulimi GL 427 Kangerlussuarmiit Narsarsuarmut. Timmisartoq Narsarsuarmut apuutinngilaq, aammalu Paamiut aqqusaarlugu Nuummut ingerlaqqilluni.
  • Sisamanngornermi 8. juulimi GL 421 Nuummiit Narsarsuarmut.
  • GL 4381 Narsarsuarmiit Qaqortumut (qulimiguulimmik).

Tunillatsissimasut ilaat 6. – 8. juulimi Nuummi Hotel Hans Egede-mi najugaqarsimavoq.

Oqaatigineqartutut maani Kalaallit Nunaanni inuk ataasoq angalasut ilaannit tunillatsissimavoq. Pineqartoq akiuussutissanik kapuinermi naammassinnissimavoq. Naluneqanngitsutut akiuussutissanik kapuinermi naammassinnissimasut tunillatsissinnaapput tunillaasinnaallutillu. Taamaattumik aamma timmisartunut taaneqartunut ilaasimasut tamakkiisumik kapitissimagaluarlutik Covid-19-imut ersiuteqarnissartik eqqumaffigilluassagaat, aammalu ersiuteqalernerminni erngerlutik peqqinnissaqarfimmut attaveqassasut inassutigineqarpoq.

Københavnimiit Kangerlussuarmut timmisartumut ilaallutik angalasimasut, issiavinni række-ni matuma siuliani taaneqartuni issiasimasut misissortereersimanngikkunik ataasinngornermi 12. juulimi misissorteqquneqarput. Tamanna aamma akiuussutissanik kapitissimasunut atuuppoq.

Timmisartumut Dash 8-mut, matuma siuliani taaneqartumut ilaallutik angalasimasut ataasinngornermi 12. juulimi misissorteqquneqarput. Tamanna aamma akiuussutissanik kapitissimasunut atuuppoq.