Karrat Kangerluanni qaqqap nikikkiartorneri suli taamaaginnartoq

Karrat 11. maaji 2021-mi Naalakkersuisut Karrat Kangerluanni tassaarsuaqarsinnaanera pillugu naatsorsukkat sukumiisut pillugit ilisimatitsissuteqarput.
Sukumiisumik naatsorsukkat nutaat takutippaat, Karrat 1-imi, Karrat 2-mi aamma Karrat 3-mi sisooriartornerit ulorianartorsiortitsisut ”allannguuteqaratik qaqqamit annertuumik sisoortoqarnissaanut, taamaalillutillu tassaarsuarmik aallartitsinissaanut ulorianartorsiortitsisorujussuusut”.

Qaammataasanit assilisat qaqqamit annertoorsuarmik sisoortoqarneranik takussutissiinngillat, kisiannili soorlu ujaqqat qaarsullu kaanngartut sisoorneri annikitsut arlaliullutik. De Nationale Geologiske Undersøgelser for Danmark og Grønland-ip (GEUS) misissugaanit takutinneqarpoq, Karrat 1 aamma 2 (ilusiliaq 1-imi inissisimasut) ukioq manna aputip aattulerneraniilli, tassalu apriilip naaneraniilli sisooriartungaatsiarsimasut.



Ilusiliaq 1. Karrat Kangerluannut aamma Nuugaatsiamut, oqaluttuarisaanermi qaqqap sisoorfianut (qorsorpaluttoq) aamma sisooriaannaat paasineqartut annersaannut (aappaluttoq) takussutissartalik. Najoqqutarisaq: Sentinel-2, Copernicus

Pingaartumik Karrat 2-mi qaqqap sivingarnani pujoralammik pinngortoqartartoq takuneqarsinnaavoq. Ujaqqat angisuut nakkaraangata, pujoralannguussimasunillu eqquigaangata tamanna pisarpoq. Qaqqaq nikerangaatsiartoq takuneqarsinnaavoq, tamannalu qanittukkut qaqqamit sisoortoqarsinnaaneranut takussutissaasinnaavoq. GEUS-ip naliliinera malillugu suli sumiiffimmi qaqqamit sisoortoqarsinnaanera allannguuteqarani ulorianartorsiorfiusorujussuuvoq.

Kisiannili qaqqap sivingarna annertunerusumik allannguuteqanngitsoq qaammataasamit assilisat takutippaat. GEUS-imi ujarassiuut piffissami aggersumi suli qaammataasamiit nikikkiartornerit malinnaaffigisinnaaniarlugit Karrat sineriaanik assilineqartartut nakkutiginiarpaat.

Karrat 1-imi aamma 2-mi qaqqamit sisoortoqassappat, tamanna tassaarsuarmik pilersitsisinnaavoq. Karrat 1-imiit aamma 2-miit sisoortoqassappat mallit qarsutsineri Nuugaasiamut 4-6 meterit missaannik, Illorsuarnut 2-4 meterit missaannik aamma Uummannap Kangerluani sumiiffinni najugaqarfiusuni 0,2-0,6 meterinik portussuseqartussatut naliliiffigineqarput. Taakku 2017-imi qaqqamit sisoortoqarnerani pilersinneqartunit annikinnerugaluartut, tamanna Karrat Kangerluanni imaani angalasunut ulorianarsinnaavoq, sarfaq sakkortoorsuaq pilersinneqarsinnaammat.

Annertunerusumik paasisaqarusunnermi attaveqarfissaq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaaneq Mette Skarregaard Pedersen tlf.: 346476 / 529844 imaluunniit e-mail: mesp@nanoq.gl eller pan@nanoq.gl.