Kalaallit Nunaata NP-inniit Kuannersuarni suliniut pillugu saaffiginnissut akissuteqarfigaa

Juulip 1-ani 2021, Naalakkersuisut NP-inniit Pisortatigoortumik ataatsimoortumik saaffiginnissut akissuteeqaatitik tunniuppaat. Saaffigginnissut Naalagaaffiit Peqatigiit nunap inoqqaavisa pisinnaatitaaffii pillugit immikkut nalunaarusiortuanit, avatangiisinut innarliissutaasinnaasut pillugit iliuuseqarnissamut atatillugu Naalagaaffiit Peqatigiit inuit pisinnaatitaaffiinik ataqqinninnissamut immikkut nalunaarusiortuanit kiisalu Naalagaaffiit Peqatigiit inuussutissarsiutit inuillu pisinnaatitaaffii pillugit suleqatigiit siulittaasuannit suliarineqarpoq. Naalagaaffiit Peqatigiinni Inuit Pisinnaatitaaffii pillugit Siunnersuisoqatigiivinut atatillugu immikkut nalunaarusiortuuneq, suleqatigiinni ilaasortat aaqqissuussallu tamarmik pingasuullutik inuit pisinnaatitaaffiinik ilisimasaqarluartuupput pituttorsimanngitsut, taamaalillutillu Inuit Pisinnaatitaaffii pillugit Siunnersuisoqatigiinni “immikkut iliuuseqartartuullutik” (Special procedures).

Kalaallit Nunaanni uranimik piiaanermut atatillugu inuit pisinnaatitaaffii kiisalu avatangiisinut sunniutaasussat pillugit aarleqquteqangaarnertik piginnaatitaasut allakkami oqariartuutigaat. Kuannersuarni suliniut silamut uumassusillillu pillugit ajortumik sunniuteqassasoq nalilerneqartoq piginnaatitaasut taavaat, inuillu pisinnaatitaaffiinut atatillugu ajortumik sunniutaasinnaasut avatangiisinullu innarliissutaasinnaasut pillugit iliuuseqarnissamut atatillugu inuit pisinnaatitaaffiinik ataqqinninnissamut taamanikkut immikkut nalunaarusiortumit 2017-imi Kalaallit Nunaannut tikeraartumit oqariartuutigineqartut uteqqinneqarlutik. Saaffiginnissuk danskit nunanut allanut Ministereqarfiat aqqutigalugu tiguneqarpoq. (Safiginnissutaa takuuk- tulluttuinnaq)

Akissummi Naalakkersuisut pingaartissimavaat saaffiginnissup apeqqutit aqqanillit suliaqarfinnut Naalakkersuisunut piginnaatitsiffiusunut tunngassuteqarnerat erseqqissaatigissallugu, kiisalu Naalakkersuisut inuit Kalaallit Nunaanni nunap inoqqaavinit demokratiskiusumik qinigaasut naqissuserneqartoq. (Akissuteqaat takuuk - kalaallisut)

Paasisaqarnerorusukkuit ataani taaneqartoq attavigisinnaavat:
Allafimmi pisortaagallattoq Tove Søvndahl Gant, Nunanut Allanut, Inuussutissarsiornermut, Niuernermut, Silallu Pissutaata Allangoriartorneranut Naalakkersuisoqarfik; e-mail: tovs@nanoq.gl telefon: 345168