Maniitsup eqqaani Sermersuarmi sisorartitsisarnissaq pillugu neqerooruteqartitsisimaneq pillugu aalajangiineq

Naalakkersuisut Qeqqata Kommunia suleqatigalugu aalajangerput Qeqqata Kommuniani Maniitsup avannaani Sermersuarmi takornarianut sisorartitsisarnissamut akuersissutinik nalunaaruteqartoqassanngitsoq.

Ataatsimut isiginnilluni aalajangiisoqarpoq, naliliiniarnermi isiginiarneqarsimasoq tassaavoq kisermaassilluni sisorartitsisoqarsinnaanera annertunerusumik ingerlatsitsisoqalernissaanik naatsorsuuteqarfigineqanngimmat. Naalakkersuisut naliliinerat malillugu, kisermaassilluni ingerlatsisinnaanermut akuersissutit aatsaat tunniunneqartassapput, sumiiffimmi ingerlatsiffiusussami kisermaassilluni ingerlatsisoqarsinnaanera peqqutaalluni, ingerlatat annertunerulersinnaaneri aningaasaliisinnaassuseqartoqarneralu.

Sukumiinerusumik paasisaqarnerusuttunut saaffissaq: Nunanut Allanut, Inuussutissarsiornermut, Niuernermut, Silallu Pissusaata Allanngoriartorneranut Naalakkersuisoqarfik: isiin@nanoq.gl