Kalaallini siullersaalluni oqaatsitigut teknologi Oqaasileriffimmi pisortanngorpoq

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup nuannaarutigalugu nalunaarutigissavaa Oqaasileriffimmi pisortaq nutaaq maanna sulilersimammat. Beatrine Heilmannip kingoraarpaa Katti Frederiksen juunip naanerani asoortoq.

Beatrine Heilmann Maniitsumi inunngorlunilu peroriartorpoq, marlunnik meeraqarpoq Poul Blochilu inooqatigalugu. Ilinniarluarsimasuuvoq inuussutissarsiornermilu oqaatsit tungaatigut misilittagaqarluarluni, aammattaaq kalaallini siullersaalluni oqaatsitigut teknologiulluni.

Beatrine 2007-imiilli Oqaasileriffimmi atorfeqalersimavoq piffissallu ilaanni pisortaagallartarsimalluni. Specialkonsulentitut sulinermini oqaatsitigut teknologiilerinermik akisussaaffeqarsimavoq, aammalu kalaallisut nutserutip ineriartortinneqarnera (MT-projekti) aqutsisuuffigalugu, kalaallisut-danskisut-kalaallisullu maskiina atorlugu nutserut ineriartortinneqartoq, taassumalu suliap 2022-p aallartinnerani tamanut saqqummiunneqarnissaa naatsorsuutigineqarpoq.

Oqaasilerinermik, Atuakkialerinermik Tusagassiutilerinermillu Immikkoortortaqarfimmit bacheloritut 2009-mi allagartartaarpoq, tassani allaaserisimallugu kalaallisut oqaatsitigut teknologii aammalu kalaallisut taggisit. Sulinermi saniatigut kandidatitut naammassissutissani suliarivaa.

Oqaasileriffik ilisimasaqarfigilluarpaa, Oqaasileriffiullu ingerlannissaanut suliassat, piumasaqaatit anguniakkallu nalunngilluinnarlugit.

Attavissaq: Naalakkersuisup allatta Paninnguaq Steenholdt Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi  Oqarasuaat +299 34 5702 emaili PSLT@nanoq.gl