Covid-19-imut ikiorsiissutit sivitsorneqarput

Matumuuna nalunaarutigineqarpoq Covid-19-imut ikiorsiissutit: ikiuigasuartarnerit, sulisoqarnermut ikiorsiissutit aamma takornariaqarnermi ingerlatatigut ikiorsiissutit 1. juli 2021-miit 31. oktober 2021 tungaanut ingerlaqqissasut.

Covid-19-imik nunarsuaq tamakkerlugu tunillaassuunneq takornariaqarnikkut inuussutissarsiummi periarfissanut kingunerluuteqarnerata sivisussusaa maanna ukioq ataaseq sinnerpaa. Akiuussutissamik kapooraanermik pilersaarut ingerlatillugu pisup takornariaqarnermut inuussutissarsiummut suli kingunerlutsitsinissaa naatsorsuutigineqarmat, inuussutissarsiummut pisarialimmik ikiorsiisarnerit ingerlatiinnarneqarnissaasa qulakkeernissaat Naalakkersuisut kissaatigaat.

Aasap ingerlanerani inuiaqatigiit amerlanerit tamakkiisumik kapitissimaleriarpata augustimi/septemberimi ammaqqinnissaq periarfissaavoq. Taamaakkaluartoq takornariaqarnikkut inuussutissarsiutit ikiorserneqarnissamut pisariaqartitsinissaat naatsorsuutigineqarpoq, taamaattumik ikiorsiissutit atuuttut oktoberip naanerani aatsaat atuukkunnaassapput.

Sulisoqarnermut ikiorsiissutit aamma ingerlatatigut ikiorsiissutit sivitsorneqarnerisa saniatigut allannguuteqanngillat ikiuigasuartarnerilli annikilliartuaartinneqassapput.

Múte B. Egede
Naalakkersuisut Siulittaasuat