Kalaallit Nunaanni uumassusillit assigiinngisitaarnerannut periusissaq siulleq

Nunarsuarmi uumasut assigiinngitsut pissusissamisoortumiit sukkanerujussuarmik nunguttarput. Taamaattumik Naalakkersuisut uumassusillit assigiinngisitaarnerannut periusissamik siullermik akuersipput. Nunami uumassusillit assigiinngisitaartuunerannik pinngortitallu pissarititaanik 2030-p tungaanut piujuartitsisumik aqutsinissamut killissarititat periusissiatigut inissinneqassallutik.

Uumasut assigiinngisitaartuunerat tatisimaneqarpoq. Nunarsuaq tamakkerlugu uumasut naasullu assigiinngitsut isumakulunnartumik nungorarput. Silamut pinngortitamullu piffissami matumani annertuumik unammilligassaqarnerani avatangiisinut, inuiaqatigiinnut kiisalu nunap aningaasaqarneranut tunngatillugu Kalaallit Nunaanni uumassusillit ataqatigiiaarnerisa uumasullu peqqissuunissaannik qulakkeerinninnissaq pingaaruteqarpoq. Uumassusillit assigiinngisitaartuunerannut sunniuteqarsinnaasut assersuutigalugit tassaapput silap pissusaata allanngoriartornera, uumasut avataaneersut, silaannaap mingutsinneqarnera kiisalu inuit akornusersuinerat. Uumasoqatigiit assigiinngisitaartut avataaneersut tassaapput uumasut naasulluunniit piffimmut nalinginnaasumik uumaffiginngisaannukaanneqartut. Uumasoqatigiit assigiinngisitaartunit uumasoq aalajangersimasoq avataaniit tassanngaannartumik nunasisoq, uumasoqatigiinnut assigiinngitsunut nunameereersunut annertuumik aarlerinartorsiortitsisinnaavoq. Tassami nunasiffigisaq uumasoqatigiit akornanni takornartap akeraanik amerlasuutigut uumaffigineqarneq ajormat.

”Naalakkersuisut Kalaallit Nunaata uumassusillit assigiinngisitaartuunerannut siullermeertumik periusissiaa akueraat. Nunatsinni uumassusillit assigiinngisitaartuunerannik pinngortitallu pissarititaanik piujuartitsisumik aqutsinissamut tunngaviliinissamut sinaakkusiinissaq Naalakkersuisunit pingaartinneqartorujussuuvoq",
taama Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund "Kalaallit Nunaata Uumasut assigiinngisitaartuunerannut periusissaa 2030"-p saqqummiunneqarneranut atatillugu oqarpoq.

”Uumassusillit assiigiinngisitaartuuneranniipput nunarsuarmi uumassusillit tamarmik. Uumasut assigiinngisitaartuunerat inuunerup pissarsiaqarfigilluarnissaanut iluaqutaapput. Pinngortitap pissarititai pisariaqartilluinnarpagut. Taamaammat Naalakkersuisut suliniutit tamarmik piujuartitsisumik tunngaveqarnissaat qulakkeerusuppaat", Naalakkersuisoq Kalistat Lund nangilluni oqarpoq.

Teknologiip ineriartorneranut atatillugu nunarsuarmi sumiiffiit tamarmik sunnertissimalerput. Uumassusillit assigiinngisitaartuunerannut aarlerinartut amerlanertigut killissamik qaangiisuusarput, soorlu silap pissusaata allanngoriartornera, silaannaap mingutsinneqarnera, plastikkimik mingutsitsineq aalisapilunnerlu. Taamaattumik nammineq nuna tamakkerlugu uumassusillit assigiinngisitaartuunerannut periusissatta saniatigut nunani tamalaani suliniutit, nunarsuarmi uumassusillit assigiinngisitaartuunerannik illersuisinnaasut qitiutinneqarnissaannik qulakkeerinneqataanissarput pingaaruteqarpoq", Naalakkersuisoq Kalistat Lund naggasiilluni oqarpoq.

Anguniakkat tallimat uumasut assigiinngisitaartuunissaannik taakkualu patajaatsuunissaannik qulakkeerinnissapput.

Naalakkersuisut Kalaallit Nunaata Uumasut assigiinngisitaartuunerannut periusissiaa 2030 atorlugu inuunermi pissaqarluarnissamut uumasut assigiinngisitaartuunissaat taakkualu patajaatsuunissaat anguniakkat tallimat atorlugit qulakkeerusuppaat. Anguniakkat tallimat tassaapput:
  1. Inatsisit attuumassutillit piujuartitsisumillu ingerlatsineq aqqutigalugit uumassusillit assigiinngissitaarneri illersorneqassapput.
  2. Pisuussutit uumassusillit piujuartitsisumik atorneqassapput.
  3. Avatangiisini pissutsit pinngortitamut inuillu peqqissusiinut iluaqutaasumik pitsanngortinneqassapput.
  4. Nunani tamalaani suleqatigiinnermut peqataalluarnerput Kalaallit Nunaata soqutigisaanik nunarsuullu uumassusillit assigiinngisitaartuunerannut illersuineranut ikiorsiinissaanik qulakkeerinnitseqataassaaq.
  5. Ilisimatusarnerit, alapernaarsuinerit atuisullu ilisimasaat uumassusillit assigiinngitsut pinngortitamillu ataqatigiinnerit pillugit ilisimasatigut annertuumik tunngavissaqarnissaat qulakkeerneqassaaq.
Kalaallit Nunaata Uumassusillit assigiinngisitaartuunerannut periusissiaa 2030 uani atuarneqarsinnaavoq.

Paasisaqarnerorusukkuit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaq, Mette Skarregaard Pedersen, oqarasuaatikkut attavigiuk: 346476 / 529844 imaluunniit e-mailikkut: mesp@nanoq.gl imaluunniit pan@nanoq.gl.

Uumassusillit assigiinngisitaartuunerat suua?

Nunarsuarmi uumassusillit tamaasa uumasut assigiinngisitaartuniipput , soorlu naasut, uumasut, pupiit, issuatsiaat, tappiorannartut il.il. Uumassusillit assigiinngisitaartut allanngorarnerisa geninit, uumasoqatigiit assigiinngisitaartunit, uumassusillit ataqatigiiaarnerannik pinngortitallu assigiinngitsumik allanngorarneranneersuupput.Taama uumassusillit assigiinngisitaartuunerat nassuiaateqarpoq... Uumasoqatigiit assigiinngisitaartup naleqqussarsinnaassusaanut nunarsuarmi lu allanngorartumi uumaannarnissaanut uumassusillit akornanni sunneeqatigiittarneq pingaaruteqarluinnarpoq.

Uumassusillit assigiinngisitaartuunerannut uumasoqatigiit assigiinngisitaartut tamarmik ilaapput, tassa arfernit anginerpaaniit imaani, nunami, apummi sikumilu tappiorannartunut. Taakku tassaapput uumasoqatigiit assigiinngisitaartut, aalisartakkagut, pisarisartakkagut, nuniattakkagut, isigiinnartakkagut minnerunngitsumillu mikingaarmata takusinnaanngisagut. Uumasoqatigiit assigiinngisitaartut taakkua nunami uumasut assigiinngisitaartuunerannut tamarmik ilaapput.