Namminersorlutik Oqartussat Kulturimut aningaasaliissutaannik kulturimillu suliaqarnermut legatinik agguaassineq

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter P. Olsen 2021-mi aappassaanik qinnuteqartitsinermut atatillugu suliniutinut katillugit 1.714.960,00 koruuninik tapiissutisinik agguaassivoq. Aningaasanik agguaassineq Namminersorlutik Oqartussat ukiumut pingasoriarlutik qinnuteqartitsisarput, kingullerlu pissaaq 1. septembari 2021. Aningaasat agguaanneqartut aningaasaliissutinit, ataani pineqartunit, sisamanit agguaanneqarput.

Tassunga atatillugu Peter P. Olsen ima oqarpoq:

-”Suliniutit amerlasuut soqutiginartuullutillu pissanganarluinnartuupput, piareerneqarnissaalu pissanganaqaat.”

Kulturimut aningaasaliissutit
Kulturimut aningaasaliissutinit suliniutinut assigiinngitsunut 5-nut 680.000,00 koruuninik tunniussaqarpoq. Taakkunannga taperneqartut akornanni eqqaaneqarsinnaapput Itsumarlo Parlo Show inuusanik isiginnaagassialiortut ullutsinni pisut aallaavigalugit quianartunngorlugit. Aammattaaq eqqaaneqarsinnaavoq isiginnaagassiaq meeqqat peqqinnartumik ammanerulernissaat, soorlu misigissutsinut tunngatillugu, Inuit Dubbing aamma Naleraq Lights pilersitsisuullutik. Aammattaaq Katuaq sammisassaqartitsinissaa taperneqarpoq, tassani sammineqassallutik pisarneq malillugu qitik erinarsornerlu najoqqutaralugit assigiinngitsutigut oqaluttuarneq.

Aningaasat inunnit ataasiakkaanit, kattuffinnit il. il. suliaminnut suliniutiminnullu atatillugu qinnutigineqarsinnaapput. Pingaartumik aningaasarsiutigalugu eqqumiitsuliortut ingerlataannut, suliniutaannut suliniutinullu allanut eqqumiitsuliornikkut qaffasissusilimmik suliaasunut aningaasat tunniunneqartarput. Aammattaaq timersoqatigiit peqatigiiffii aaqqissuussinernut atatillugu eqqumiitsuliortunik suleqateqarnerminni eqqumiitsuliortut angalanissaannut aningaasartuutinut matussutissaannik tapiissutissanik qinnuteqarsinnaallutik.

Filmiliornermik ingerlataqartunut aningaasaliissutit
Filmiliornermik ingerlataqartunut aningaasaliissutinit filmiliornermik pilersaarutinut pingasunut katillugit 294.000,00 koruuninik tapiissutinik tunniussisoqarpoq. Taakkunani eqqaaneqarsinnaavoq Qivioq Kern Kreutzmannip piviusulersaarutaa Hans Egedep nunatsinnut tikeqqaarneraniit ukiuni 300-nngortorsiornera.

Filmiliornermik ingerlataqartunut aningaasanit kalaallit filmiornermik pilersaarutaannut tapiissutinik qinnuteqartoqarsinnaavoq, pingaartumik oqaluttualiornernut piviusuliortunillu suliaqartunut.

Atuakkat kalaallisoortunut aningaasaliissutit
Atuakkanut kalaallisut allatanik tapiissutaasartunit suliat tallimat katillugit 297.000,00 koruuninik agguaassiffigineqarput, taakkunanilu tapiiffigineqartut ilai ukuupput Arctic Media-p saqqummersitassaa Tallorut, meeqqanut annernut saaffiginnittoq nunaqqatitsinnit, Inuit, kakiueriaasiannit oqaluttuaq. Aappaattut Maanuup Atuakkiorfia qajavissuit isertugaataannik saqqummiussinissaq inuuniarnerminnut iluaqutigisartagaannik tikkuussisoq.

Qinnuteqartoqarneratigut atuakkanut kalaallisuunut tapiissuteqartoqartarpoq. Aammattaaq saniatigut atuakkianut kalallisut nutserneqarsimasunut aningaasanik tapiisoqarsinnaalluni. Qinnuteqaateqartup Kalaallit Nunaanni najugaqartuunissaa tapiissuteqartoqarnissaanut piumasaqaataavoq. Aamma aningaasaliissutit sammisaqartitsinermut allanut atorneqarsinnaapput, soorlu atuakkialerinermut pikkorissartitsinerit, atuakkat immiussat saqqummersinneqarnerinut allanullu.

Kulturimik sulialinnut aningaasaliissutit
Qulaani qinnuteqarfigineqarsinnaasut saniatigut eqqumiitsuliortut pingasut katillugit qaammatini 14-ini sulinissaminnut kulturikkut sulialinnut aningaasaliissutinik 310.772,00 koruuninik tapiiffigineqarput. Tapiiffigineqartut ilaanniipput Inuuteq Akvilas Storch atuakkiamik saqqummersitsiniartoq, Pandemic of Love, Corona peqqutaalluni mattusimasoqarnerani illuatungeriinnik marlunnik misigisimasaanik – illoqarfimmi kisimiilluni allanik naapitsinissamik ersineq, illuatungaanilu asasamik marlooqateqarneq kisimiilernissamullu ersineq.

Aningaasanik tapertittunik immikkut eqqaasaqarneq
Naalakkersuisoq Peter P. Olsen aaliangersimavoq immikkut aningaasanik katillugit 200.000,00 koruuninik tapiissuteqarusulluni. Taakkulu aningaasat tapiutaasut kulturikkut immikkut malunnartitsisunut tunniunneqarput nuna tamakkerlugu, nunat avannarlerniit aammalu nunat assigiinngitsuniit eqqumiitsuliortunik katersortitsineq sapaatip akunneranik sivissususeqartumik kulturfestivaalertitsissallutik, suleqatigiinnissamik, pilersitseqataanermik aammalu attaveqaqatigiissitsilernermik imalimmik. Taakkulu immikkut tapertittut tassaapput Nuuk Nordisk Kulturfestival.

Kulturimut aningaasaliissutinik, Filmiliornermik ingerlataqartunut aningaasaliissutinik, Atuakkat kalaallisoortunut aningaasaliissutinik aammalu Kulturimik sulialinnut aningaasaliissutinik qinnuteqartitsinissaq tullia pissaaq 1. septembari 2021. Paasissutissat allat aammalu qinnuteqarnissamut immersugassat uani nassaarisinnaavatit www.sullissivik.gl

Paasisaqarnerorusukkuit uku attavigikkit:

AC Fuldmægtig Naja Brandt, direkte 345741, njbr@nanoq.gl

Kulturkonsulent Mika Lyberth, direkte 345744, mlyb@nanoq.gl