Aqutsinermut pilersaarut nutaaq nipisannullu nalunaarut



Nipisannut arnarlunnut aqutsinermi pilersaarutip nutarterneqarnissaa pisariaqartinneqarsimavoq, tassani Kalaallit Nunaata nipisanniarnermi piujuartitsinissamik MSC-mik nalunaaqutserneqarnissamut periarfigissaarnissaa qulakkeerniarneqarpoq. Taamaattumik Naalakkersuisut arnarlunnut aqutsinermi pilersaarut nutaaq akuersissutigaa kiisalu nipisanniarnermi nalunaarut nutaaq, taannalu atuutilissaaq 1 august 2021.

Suleqatigiissitaq tulliuttumi suliffinnit taagorneqartunit inuttalik aasaq 2020-imiilli aqutsinermi pilersaarummik peqqissaarullugu nutarteripput: Aalisarnermut Piniarnermullu Naalakkersuisoqarfik, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, KANUAANA, Pinngortitaleriffik, Sustainable Fisheries Greenland, KNAPK, Sulisitsisut, Royal Greenland, Arctic Prime Fisheries aamma Greenland Seaharvest.

Aqutsinermi suliniutit nutaat makku atortuulersinneqarput:
  • TAC-mik aqutsiveqarfiit akornanni agguaassinermut agguaasseriaatsip nutarterneqarnera
  • Nipisat ikiliartornerat malunnarsissagaluarpat, qanoq iliuuseqarnissamut pilersaarut (tunngaviit aallaaviusut)
  • Akuersissutinik najukkanni aqutsisoqarfimmi tunniussisarneq aqutsisoqarfiullu taassuma sanilianut
  • Piffissami 1. marts 2021 – 28. februar 2023 ukiuni marlunni atuuttumik inuussutissarsiutigalugu nipisanniarnermi aalisarnissamik ingerlatsisunut nutaanut akuersissusiortarnerup unitsinneqartarnera
  • Saniatigut pisarisuukkanik, pingaartumik timmissanik imarmiunik, nalunaaruteqartarnissamut periusissiaq
Aqutsinermi pilersaarut apn.gl-imi takuneqarsinnaavoq.

Tamatuma saniatigut Aalisarnermut, Piniarnermut Nunalerinermullu Naalakkersuisoqarfik Nipisanniarneq pillugu nalunaarummut atatillugu aaqqissuusseqqinnermik suliaqarpoq, aqutsinissamik pilersaarummi iliuusissanut nutaanut naapertuunnissaa taamaalilluni anguneqassammat. Nalunaarummi iliuusissat nutaat aamma makkuupput:
  • Angallatinut inuussutissarsiutigalugu nipisanniartunut, aalisarnermut angallat atorneqartussaq qinnuteqartup pigippagu akuersissut aatsaat tunniunneqassaaq.
  • Qassutit qimaannakkat qaqeriarlugit pigiliussinnaanerat periarfissaavoq nutaaq
  • Angusallunnik piffissaq nipisanniarfissaq. Inuussutissarsiutigalugu aalisarneq inuussutissarsiutiginagulu angusallunnik nipisanniarneq piffissami 16. juli – 31. januar inerteqqutaavoq.
  • Akuersissummik pigisallip nammineq angallataanit namminerisamik umiatsiamut usinik nuussinermut akuersissut nalinginnaasoq. Nipisanniarnermi usinik nuussinernut taamaattunut nalunaaruteqartussaatitaaneq ilaanngilaq.
Nipisanniarneq pillugu nalunaarut uani takuneqarsinnaavoq.

Paasisaqarnerorusukkuit Aalisarnermut Piniarnermullu Naalakkersuisoqarfik attavigiuk , apn@nanoq.gl.