Katerisimaartarnernut aamma ininut kikkunnit tamanit iserfigineqarsinnaasunut piumasaqaatinik nutaamik qasukkaanissat nutaat

Naalakkersuisut katerisimaartarnernut nalunaarummi ininut kikkunnit tamanit iserfigineqarsinnaasunut piumasaqaatinik qasukkaanissaq aalajangiuppaat. Nalunaarut ullumi 1. Juuli 2021-mi atuutilerpoq.

Maanna illup iluani silamilu aaqqissuussat, nalliuttorsiornerit, sammisassaqartitsinerit assigisaalluunniit aaqqissussanut peqataaniarnermi angalaqqaarluni, kommuninit allanit, illoqarfinnit nunaqarfinnit imaluunniit eqqaaniittunit tamanit, peqataaffigineqarsinnaanngorput.

Siusinnerusukkutulli, aaqqissuussineq sioqqullugu ulluni 30-ni illoqarfimmi, nunaqarfimmi imaluunniit piffimmi aaqqissuussamik ingerlatsiffiusussami Covid-19-imik tunillatsittoqarsimanngippat aatsaat ingerlanneqarsinnaavoq.

Piumasaqaatit sinneri allanngortinneqanngillat taamaammallu suli atuutsinneqarlutik, tamatumunnga ilanngullugit eqqiluisaarnissaq pillugu Nunatta Nakorsaaneqarfianiit paasissutissartalinnik nivinngaassuisoqartarnissaa, Nunatta Nakorsaaneqarfiata innersussutai malinneqarnissaat sapinngisamillu pisinianut pulaartunullu imermik qaqorsaammillu imaluunniit assammut spritimik peqarnissaa.
Nalunaarut Naalakkersuisut nittartakkatigut saqqummiussisarfianni nalunaarutigineqareerpoq

Coronamut tunngatillugu apeqqutissallit corona hotline oqa. nr. 801100 imaluunniit e-mail corona@nanoq.gl aqqutigalugit attaveqartassapput.

Tusagassiutinut nalunaarut pillugu apeqqutissallit Immikkoortortaqarfimmi pisortaq Martin Pedersen mrpd@nanoq.gl-ikkut imaluunniit oqaras.: +299 34 66 18 aqqutigalugit pissarsiarineqarsinnaapput