Tuluit OLT-vi EU-mut Nunat Namminersortitallu Imarpiup Akianiittut OLT-vinut akornanniikkunnaarput

Nunanut allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg Nunat Namminersortitallu Imarpiup Akianiittut OLT-it Ministeriisa immikkut ittumik junip 24-anni 2021 isiginnaarutikkut ataatsimiinnerani peqataavoq. Pele Broberg Nunanut allanut, Inuussutissarsiornermut, Niuernermut Silallu Pissusianut Naalakkersuisoqarfimmi atorfilittanit Nuummeersunit Bruxellesimeersunillu peqateqarpoq. Taamatuttaaq Nunat Namminersortitallu Imarpiup Akianiittut ministerii tamarmik peqataapput.

Nunat Namminersortitallu Imarpiup Akianiittut Kattuffianni (OCTA) siulittaasuusoq, Ny Kaledonia, ataatsimiinnissamut aggersaasuuvoq.

OLT-ministeriisa immikkut ataatsimiinnissaannut siunertaavoq tuluit OLT-visa Brexit malitsigisaanik OCTA-mit pisortatigoortumik tunuarnissaat. Ippassaq tungaanut OLT-it innuttaqartunit 22-iusunit UK OLT-it qulingiluaapput (9).

Aammattaaq siunertaavoq OCTA-p UKOTA-llu akornanni suleqatigiinnissaq pillugu paaseqatigiinnermik nalunaarutip (MoU) akuerineqarnissaa.
Kunngeqarfiup Peqatigiit, Tuluit Nunaat, aammalu Irlandip Avannaata EU-mit ilaasortaajunnaarneratigut tuluit Nunat Namminersortitallu Imarpiup Akianiittut EU-mi Nunat Namminersortitallu Imarpiup Akianiittutut (OLT) inissisimajunnaarput. Tamanna junip 24-ani 2021 atuutilerpoq.

Illuatungeriit isumaqatigiissutigaat ataatsimut soqutigisaqarfinni suleqatigiinniarlutik, soorlu ataavartumik nukissiuteqarneq, uumasoqatigiit assigiinngisitaartut, silap allanngoriartornera imaanilu avatangiisit.

Tuluit OLT-visa OCTA-mit aninissaat OCTA-p malittarisassaannik allanguisariaqalernermik pisariaqartitsilerpoq, tamannalu ataatsimiinnermi akuersissutigineqarpoq.

Ministerit ataatsimiinnerat nikallungaffiulluni ingerlanneqarpoq, tuluit OLT-visa 2003-miilli pitsaasumik suleqatigisimanerat tassunga killittoq nikallungassutaalluni. Illuatungariit OCTA kattuffik ataatsimoorullugu sanarfinikuuaat, taamatullu atuilluartuunermik aallaavilimmik OLT-ni ineriartortitsineq EU suleqatigalugu ingerlannikuullugu. Naalakkersuisoq Pele ataatsimiinnermi aamma oqaaseqarpoq, OLT-milu ministerit allat assigalugit ajuusaarutigaa illuatungeriit avissaartariaqarnerat, taamaattorli suleqatigiinnerup MoU aqqutigalugu ingerlaannarnissaa nuannaarutigalugu:

”Tuluit OLT-visa kattuffitsinnit ilaasortaajunnaarnerat ajuusaarnaqaaq, ullumikkulli atsiorneqartoq MoU aqqutigalugu suleqatigiinnerput ingerlatiinnassavarput. MoUp siunissami suleqatigiinnissaq aallartilersoq ersersippaa, tassungalu ilaanissara qilanaaraara.”

Attaveqarfissaq:
Mininnguaq Kleist, Sinniisoqarfimmi pisortaq, Kalaallit Nunaata Bruxellesimi Sinniisoqarfia, Oqa: +299541587, e-mail: mikl@nanoq.gl