Kalaallit Nunaanni inuusuttut 35 %-ii pitsaasumik meeraaffeqarsimanngillat

Inuusuttut pingajorarterutaat sinnerlugit meeraanerminni imigassamik, nakuusernermik kinguaassiutitigullu atornerlunneqarnermik ajornartorsiuteqarneq misigisimavaat. Taamaattoqarsimanera inuusuttut inuusuttuunerminni eqqarsartaatsikkut peqqissusaannut peqqissuunissaannullu unammilligassaqartitsilersarpoq.  Ingammik meeraaffimminni imigassap atugaasimanera eqqarsartaatsikkut peqqissusaannut kinguneqartarpoq, taamaattoqarsimaneralu inersimasunngornerminni suli sunnerneqaatigisarpaat. Nalunaarusiap nutaap tamanna takutippaa.

 

Nalunaarusiami “Kalaallit Nunaanni 15-iniit 34-inik ukiullit akornanni eqqarsartaatsikkut peqqissuseq aamma peqqissuseq”-mi, meeraaffimmi imigassamik ajornartorsiuteqarnerup meeqqat peroriartornerminni nakuuserfigineqarnissaat innarlerneqarnissaalluunniit malunnaatilimmik aarlerinarsisittaraa, tamatumuuna tamanut erseqqissarneqarpoq. Ilaquttat imigassamik ajornartorsiuteqarsimappata, angerlarsimaffiup nakuuserfiunissaata ilimanassusaa 26-eriaammik qaffasinnerulersarpoq.  Illoqarfimmi najugaqarnani nunaqarfimmi peroriartorsimagaanni, kinguaassiutitigut atornerlunneqartarnerit immikkut unammilligassaasut nalunaarusiap aammattaaq takutippaa.

 

Inuusuttut eqqarsartaatsikkut peqqissusaannik pitsaanerulersitsisut, illersuutit arlallit misissuinermi nassaarineqarmata, misissuinermi nutaartaavoq.  Assersuutigalugu nuniagiarnerit, kangerlummi umiatsiamik angalaarnerit kiisalu ilaqutariit nammineerlutik aalisakkamik pisaaminnik unnukkut nerinerat taakkununnga ilaapput.  Taakku tamarmik inuusuttut tarnimikkut peqqissusaannut pitsaasumik sunniuteqartarput.  Ikumatitsinerit imaluunniit ilaquttat ikinngutillu ilagalugit nuniagiarnerit, ilinnut ilaquttanut ilaasutut ataqatigiinneq sakkortunerusumillu ikinngutigiinnerit kulturinnullu attaveqarneq pilersittarpaat.

 

“Angerlarsimaffimmi imigassartornerup nakuusernernut innarliinernullu navianaat annertusitittaraa massakkut uppernarsarneqarmat pitsaasuuvoq.  Tupaallaatiginngilarput, massakkulli aalajangersumik oqaatigineqarpoq”, Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisoq Eqaluk Høegh oqarpoq nangillunilu:  “Pissutsit eqqarsartaatsimik peqqiillisitsisut sapinngisagut tamaasa atorlugit annikillisinniassavagut.  Kisianni aamma pissutsit pitsaasut inuusuttunut eqqarsartaatsikkut peqqissuulersitsisut suliaqarfigisinnaavagut.  Meeqqat inuusuttullu naligiimmik periarfissaqassapput.  Taakkumi siunissaraagut taamaattumik pitsaasumik peroriartornissaat isumagisariaqarparput.  Tamanna tamatsinnut iluaqutaavoq.”  Kalaallit Nunaanni 15-iniit 34-inut ukiullit akornanni 51%-init ikinnerunngitsut ajunngilluinnartumik peroriartorsimammata tassunga ilanngullugu taasariaqarpoq.

 

Inerniliussat qanoq atorsinnaavagut

Meeqqanut pitsaasumik toqqissisimasumillu peroriartortitsinissamik suliaqarnermi misissuinermit inerniliussat atorneqassapput.  Inuusuttunik oqaloqatiginninnerpiaq atugarissaarnerup pitsaanerusup pilersinnissaanut pingaaruteqarluinnarpoq.  Taamaammat inuusuttut suleqatigalugit, inuusuttut siunissami eqqarsartaatsimikkut peqqissuunissaat qulakkeerniarlugu, innuttaasut peqqinerulernissaannut pilersaarummi Inuuneritta III-mi ataqatigiissillugu aaqqissuussamik pissutsit illersuutaasut suliamut ilanngunneqassapput.

 

Inuusuttut aarlerinartorsiortut eqqartartaatsikkut peqqissusiisa siunissami malinnaaviginissaanut periarfissaqalersimmatigut misissuinerup pitsaaqutigaa.  Meeqqanut inuusuttunullu pitsaasumik peroriartornerminni atugassaqartinneqarsimasunut naleqqiullugit meeqqat inuusuttullu pitsaanngitsumik meeraanerminni atugassaqartitaasimasut, inersimasunngornerminni qanoq ilillutik imminnut napatinnersut pillugit ukiuni tulliuttuni ilisimatusartoqarsinnaavoq.

 

Nalunaarusiaq uani takuneqarsinnaavoq

 

Attaveqarfissaq

Paasisaqarnerorusukkuit ministerip allattaa Julia Lynge Ezekiassen ugguuna e-mail: jeze@nanoq.gl –ikkut imaluunniit oqarasuaat + 299 346495 atorlugu attavigiuk