Meeqqat aarlerinartorsiortut sukkanerusumik pitsaanerusumillu sullinneqartalerput

Kalaallit suliassanik suliarinnittartut qallunaallu isumaginninnermut siunnersortuisa akornanni suleqatigiinneq Eqaluk Høeghip Astrid Kragimik ataatsimeeqateqarnermini oqallisigaa. Meeqqat atugarliortut pillugit suliat passunneqarnerat kulturillu akornanni piginnaasat pillugit illua'tungeriit ilisimasaqarnerulersimapput.

Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisoq Eqaluk Høegh Danmarkimi isumaginninnermut utoqqarnullu ministeri Astrid Krag marlunngornermi 22. juni ataatsimeeqatigaa, tassani meeqqat inuusuttullu pitsaanerusumik atugaqalernissaannut iliuuseqarnermi suliassanik suliaqarnermi ikiuunnermut kalaallit- qallunaallu suleqatigiinnerat oqaloqatigiissutigineqarluni. 

 

Kalaallit- qallunaallu suleqatigiinnerat kommunillu najukkani iliuuseqarnerat iluaqutigalugit kommunini meeqqat pillugit suliat suliaralugit isumaginninnermik siunnersortit suliassanillu suliarinnittartut qaammatini kingullerni ulapissimapput. Illua'tungeriinnit naammagisimaarneqarluartumik suliniarneq naammasseqqammerpoq.

 

Pingaartumik suliassanik suliarinnittartut meeqqat inuusuttullu pillugit sulianik ilisimasaqarnerulerput, tamannalu Kalaallit Nunaanni meeqqat atugarliortut pitsaanerusumik sullinneqarnissaannik qulakkeerinnissaaq.  Kalaallit Nunaanni sulineq isumaginninnermik siunnersortit kulturi pillugu piginnaasaannik pingaartumik pitsanngorsaataasimavoq, tamannalu Danmarkimi sulinerminni atorsinnaavaat.

 

Meeqqanut, Inuusuttunut, Ilaqutariinnut Inatsisillu Atuutsinneqarnerannut Naalakkersuisup, suleqatigiinneq pitsaasutut isigaa: "Suliassat suliarineqarnissaannut kommunit ikiorneqarsimammata nuannaarutigaara.  Ajoraluartumik suli ataavartumik ikiorneqarnissamik pisariaqartitsisoqarpoq, sulilu suliniuteqaqqinnissamik atorfissaqartitsisoqarluni", Eqaluk Høegh oqarpoq.

 

Isumaginninnermik siunnersortit Danmarkimi kommuninit pingasunit atukkiunneqarsimapput meeqqallu pillugit suliat suliarineqarsimanngitsut ikilisarnissaannik suliniuteqarneq qaammatini sisamani ingerlasimalluni. Suliassanik suliarinninnermi suli unammilligassaqarpoq. Kommunit sulianik suliarinninnermut ikiorneqarsimanertik nuannaarutigaat taamaammallu sulianik suliarinninnermi suli annertunerusumik ikiorneqarnissamik periarfissat misissorneqarnissaat sulissutigineqarpoq.

Attavissaq

Paasisaqarnerunissamut attavigineqassaaq Naalakkersuisup allattaa Julia Lynge Ezekiassen, e-mail: jeze@nanoq.gl imaluunniit oq. + 299 25 78 54