Ukiumiit pisassiiffiusumiit 2020-miit tikaagullittassat pisarinngitsuukkat ukiumut pisassiiffiusumut 2021-imut nuunneqarneri

Kalaallit Nunaata Kitaani

Ukiumiit pisassiiffiusumiit 2020-miit tikaagullittassat pisarinngitsuukkat 55-iusut, ukiumut pisassiiffiusumut 2021-mut nuunneqarsinnaapput. Pisassiissutit pisarinngitsuukkat taakkua Kitaani piniaqatigiilluni tikaagullinniartartunut aamma qamutilissortunut nungunneqarnissaasa tungaanut paggatassiissutitut pisassanngortinneqarput. Tikaagullinniarneq inatsisit atuuttut malillugit ingerlanneqassaaq akuersissummillu pigisaqarnissaq piumasaqaataavoq ilanngullugulu qinnuteqartut atuuttumik inuussutissarsiutigalugu piniarsinnaanermut allagartaqarnissaat.

 

Tunngaviusumik tikaagullittassat qamutilissortunut umiatsiaararsortunullu 21. Decembarimi 2020-mi tusagassiorfitsigut nalunaaruteqarnikkut agguaanneqartut allannguuteqanngillat.

 

Angallatit kiisalu ataatsimoorluni tikaagullinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut nalunaarut atuuttoq malillugu 2021-mi 1. Januaarimiit 2021-mi 31. Decembari ilanngullugu tikaagullinniarsinnaapput.

 

Tunu    

Tikaagullittassat ukiumiit pisassiiffiusumiit 2020-miit pisarinngitsuukkat pingasuupput, ukiumullu pisassiiffiusumut 2021-mut nuunneqarsinnaallutik. Pisassiissutit pisarinngitsuukkat taakkua Tunumi piniaqatigiilluni tikaagullinniartartunut paggatassiissutitut pisassanngortinneqarput. Tikaagullinniarneq inatsisit atuuttut malillugit ingerlanneqassaaq akuersissummillu pigisaqarnissaq piumasaqaataavoq ilanngullugulu qinnuteqartut atuuttumik inuussutissarsiutigalugu piniarsinnaanermut allagartaqarnissaat.

 

Tunngaviusumik tikaagullittassat aqutsiveqarfinni marlunni pineqartuni umiatsiaararsortunut 21. Decembarimi 2020-mi tusagassiorfitsigut nalunaaruteqarnikkut agguaanneqartut allannguuteqanngillat.

 

Ataatsimoorluni tikaagullinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut nalunaarut atuuttoq malillugu 2021-mi 1. Januaarimiit 2021-mi 31. Decembari ilanngullugu tikaagullinniarsinnaapput.

 

 

 

 

Tikaagullinniarnissamut piumasaqaatit (www.inatsisit.gl)

Arfernik angisuunik piniarneq nalunaatutit tullinnguuttut malillugit ingerlanneqassaaq:

  • Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 9, 6. december 2018-imeersoq aamma
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.

 

Pisassat sinneri

Pisassiissutinik pisarinngitsuukkanik nuussinermi (carry-over) periaaseq IWC-mi ataatsimiinnermi kingullermi (IWC 67, Septembari 2018) akuerineqartoq malinneqarpoq.

 

Malugeqquneqarpoq Kalaallit Nunaata Kitaani pisarinngitsuukkanik nuussisinnaanermi killissarititaasoq tikaagullinniit 15-niit ukiumut pisassiissutaasunit 164-sunit 50%-mut qaffassimasoq, tassalu annerpaamik tikaagulliit 82-it taamatut nuunneqarsinnaallutik. Ilisimatuussutsikkut ataatsimiititaliap nalunaarutigereerpaa nuussisinnaanermi killissarititaasumik qaffaaneq pineqartoq piujuaannartitsinermut ajortunik kinguneqassanngitsoq. Kalaallit Nunaata Kitaani pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2018-iuvoq.

 

Malugeqquneqarpoq Tunumi pisarinngitsuukkanik 2019-imiit aamma 2020-miit nuussisinnaaneq tikaagullinnut 3-nut killeqarsimammat. Taassuma kingorna pingasuniit ukiumut pisassiissutaasunit 20-sunit 50 %-mut qaffanneqarpoq, tassa amerlanerpaamik 10-t 2021-miit atuutilerluni). Ilisimatuussutsikkut Ataatsimiititaliaq nalunaaruteqarpoq nuussisinnaanermut qaffaaneq pineqartoq uumasoqatigiit amerlassusaannik innarliinavianngitsoq. Tunumi pisassiissutinik pisarinngitsuukkanik nuussinermi amerliliisinnaanermut ukioq aallartiffiusoq 2020-usimavoq.

 

Arfernik angisuunik, soorlu tikaagulliusaanik, arfivinnik aamma qipoqqarnik, ikittuinnarnik pisaqartoqartarnera pissutigalugu arfernik angisuunik taakkunannga pisarinngitsuukkanik nuussisoqassanngilaq.

 

Kalaallit Nunaanni arferit anginerit pisassat Arfanniarnermut Ataatsimiititaliarsuup (IWC), pisassiissutinik aalajangiisarsinnaatitaasuusup, inassuteqarnera tunngavigalugu aalajangersarneqartarput. Ataatsimoortumik ukiunut 7-nut atuuttumik tikaagulliusaanik, arfivinnik, qipoqqarnik Kitaanilu tikaagullinnik aammalu Tunumi tikaagullinnik pisassiissutit piffissami 2019-imiit 2025-i ilanngullugu atuupput. Ukioq pisassiiffiusoq naagaangat nalilersuineqartartussaavoq, ukiumut tullermut pisassiinissaq nutaamik inassuteqaateqartoqarsimassagaluarpat pisassanillu qaangiisoortoqarsimassagaluarpat tunngavigalugit nalimmassarneqassaaq.

 

 

Sukumiinerusumik paasisaqarusukkaanni Aalisarnermut Piniarnermullu Immikkoortortaqarfimmi immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl