Munck Gruppen-ip akisussaassusilimik pissuseqarnissaa pisariaqarpoq

Mittarfiliortiternernut tapersersuigaluaraanni akerliugaluaraanniluunniit Munck Gruppen entreprenøritut suliassamik angisuumik, inuiaqatigiinnullu kalaallinut pingaarutilimmik suliaqarnera avaqqunneqarsinnaanngilaq.

Tamanna suliffeqarfiup najukkami inuiaqatigiinnut akisussaaqataanerminik ilisimaarinninnissaanut, aammalu inuiaqatigiinni toqqissisimanermik pilersitseqataanissaanut tunngaviusussaavoq.

Minnerunngitsumik piffissaq nunarsuarmi tuniluuffiusoq, tamatta tuniluunnermik Kalaallit Nunaannut tikisitsaaliuiniarluta killilersuinernik atuiffigisassarput eqqarsaatigalugu. Innuttaasut ikittunnguuvugut siammarsimasuullutalu, aammalu peqqinnissaqarfimmik atuisinnaanerput Danmarkimi EU-miluunniit atuisinnaanertut inngilaq.

Naalakkersuisoq Naaja H. Nathanielsen oqarpoq:
Tamatta killilersuinernik atuuttunik malinninnissamut akisussaassuseqarnitsigut tuniluunnermik siaruartitsinnginnissaq sakkussatta pingaarnersaraat. Nappaatit suulluunniit alianartuupput, uungalu inummut allanullu ulorianartorsiortitsisinnaallutik. Aamma Covid-19 peqqutigalugu sulianik matusinerit suulluunniit suliffeqarfinnut illoqarfinnulluunniit ataasiakkaaginnarnut eqquisanngilaq. Tamanna tamatsinnut akisusarpoq.

Pisumi matumani Munck Gruppen-ip ersarissumik akisussaassusilimmillu aqutsinissaa amigaatigaara. Suliffeqarfimmiit siunissami qanoq iliorluni tamatta inuiaqatigiinni akisussaaqataanitsinnik kivitseqataanissamut oqariartuuteqartoqarnissaa amigaatigaara. Munck Gruppen-ip aqutsisuinit suliffeqarfimmi COVID-19-ip tuniluunneranik unitsitsiniarluni suliniutissat suut suliniutigineqarniarnersut pillugu ilisimatinneqarnissara qilanaaraara.



Annertunerusumik paasisaqarusunnermi Naalakkersuisup allattaa Jeanette L. Petersen, Ineqarnermut, Attaveqatigiinnermut Naligiissitaanermullu Naalakkersuisoqarfik, uunga attaveqarfigineqassaaq: jelp@nanoq.gl.