Naalakkersuisup Maria Grødem kaffisoqatigaa

Ilinniartitaanermut, Kultureqarnermut, Timersornermut Ilageeqarnermullu Naalakkersuisunngorlaap Peter OIsenip Maria Grødem Crossfitimi USA-mi qaammatip tulliani VM-eqataasussaq naapippaa. Maria Grødemip USA-mut angalanissaa naapinnermi pingaarnertut eqqartorneqarpoq.  Naalakkersuisup Kalaallit Nunaanni Timersoqatigiiffiit Kattuffiat aamma Elite Sport Greenland oqaloqatiginikuuai, tassani pikkorivissut timersortarneranni killiffiit ikiorsiinissamullu aaqqiinerit oqaloqatigiissutigineqarput.

Nunatsinni timersorneq siuarsarniarlugu maanna ilisimalikkat siunissami atorluarneqassasut naalakkersuisut timersoqatigiiffinnilu kattuffiit neriuutigaat.

-    Timersoqatigiit kattuffiata GIF-ip nunarsuaq tamakkerlugu kalaallit timiminnik aalatitsinerpaanngornissaat 2030-imi anguniagaraat, tamanna Naalakkersuisunit taperserneqarpoq. Taamatullu anguniagaqarniarnermi meeqqat inuusuttullu maligassiorluarneqartariaqarput, isumaqarpungalu illit assersuutissatsialaasutit. Crossfitimik unamminissamut, nunarsuaq tamakkerlugu peqataaffigineqartumut, anngupputit, tamanna piumassuseqarnermik tunniusimanermillu takutitsivoq. Tamannalu uagutsinni neriuummik sinnattunillu pilersitsivoq. Tamanna naalakkersuisunit qujamasuutigaarput illersorpatsigillu, Naalakkersuisoq Peter Olsen Maria Grødemimut oqarpoq.

Elite Sport Greenlandimi siulittaasoq naapinnermi aamma peqataavoq, Crossfitimilu VM-imi nunatsinnit peqataasoqarnissaa taassuma nuannaralugu oqaatigaa:

-    Maria Grødem Elite Sport Greenlandimit tapersersorparput naleqartitatsinnik aallussimmat, tunniusimasuummat kiisalu uteriitsuunera peqqutigalugu. Taamaattumik nunatsinni maligassiuisutut oqaatigineqarsinnaalluarpoq. Maria ingerlalluarnissaanik kissaapparput, neriuppugullu VM-mut peqataalernera nunatsinni meeqqanit inuusuttunillu nukittuallaataajumaartoq, Elite Sport Greenlandimi siulittaasoq Nikolaj Christoffersen taama oqarpoq.

Naalakkersuisup Maria Grødem qanigisaalu ajunnginnerpaamik kissaappaat unamminernilu malinnaaffiginissaa qilanaaralugu.

 

Annertunerusumik paasiniaaffigineqarsinnaavoq: Naalakkersuisumut allatsi Paninnguaq Steenholdt pslt@nanoq.gl