Issittumi piginnaasaqalernissamut isumaqatigiissummut tunngatillugu oqaloqatigiinnerit

Issittumi piginnaasaqalernissamut isumaqatigiissummut tunngatillugu aaliangiisoqarnikuunngilaq:
Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg-ip maluginiarsimavaa Danskit issittumi piginnaasaqalernissamut isumaqatigiissummut (Arktisk kapacitetspakke) tunngasumi oqaaseqaatini, ima paasinnittoqarsimasoq, isumaqatigiissutaasimasoq Naalakkersuisuniit itigartinneqarsimasoq.

Tusagassiutitigut isumalersuititsisimaneq tunngaveqarpasippoq Naalakkersuisup erseqqarissaassutigimmagu isumaqatigiissut danskit Folketingiani partiiniit imarisaasa isumaqatigiissutigineqarsimanera. Ilanngullugulu Naalakkersuisumit erseqqissarsimasaa, qinersinermi nunami allanngortoqarnissaanik kissaateqartoqarnera, suleqatigiilertullu nunarput sakkulersorfiussanngitsoq sulissutigineqassasoq. Piviusut taakku Naalakkersuisup saqqummiussaani qitiusimapput.

Naalakkersuisup paasissutissat nunanut allanut sillimaniarnermullu tunngasut sukimiinerusumik NASA (Nunanut Allanut Sillimaniarnermullu Ataatsimiititaliaq) ataasinngorneq 7/6 apuussinnaasimavai, ilanngullugulu qulakkeerniarsimallugu partiit siulittaasui marlunngorneq 8/6 isumaqatiinninniarnermi ineriartornerniit paasissutissat pisariallit apuunnissaat, taamaammallu tusagassiutinut erseqqissaassut aatsaat maanna nassiussinnaasimavoq.

Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg aamma Danmarkimi Illersornissamut ministeri Trine Bramsen pitsaasumik isumalluarnartumillu Danmarkip issittumi piginnaasaqarnerulernissamut isumaqatigiissutaa pillugu oqaloqatigiinnerit ataavartut ingerlappai. Naalakkersuisoq isumaqatigiissummut illersornissamut ministerimut itigartitsilluni nalunaaruteqarnikuunngilaq. Naalakkersuisullu Naalakkersuisunngortut nutaat pingaartitaanni anguniakkat pillugit apuussinerani paasinninneq annertusoq misigalugu, taakkununnga ilaalluni sakkutuunik ilinniartitsisinnaanerup sakkutuujunngitsunut sammitillugu ilinniartitsisinnaanernut. Pitsaasumik oqaloqatigiinnermik paasinninneq Illersornissamut ministerip Trine Bramsenip oqaatigisimasaa, Naalakkersuisumit tamakkiisumik taperserneqarpoq, taamatullu oqaloqatigiinnerit ingerlaqqinnissaannut qilanaarluni.
Soorluttaaq Naalakkersuisup danskit naalakkersuisui arlallit suleqateqarluarnini pitsaasumillu oqaloqatigiinnerit ataavartut qilanaarigai.

Attaveqarnermi paasissutissat:
Juno Berthelsen, Nunanut Allanut, Inuussutissarsiornermut, Niuernermut Silallu Pissusianut Naalakkersusumut allatsi tlf.+ 299 26 73 72, e-mail: jube@nanoq.gl