Ilimanami eGUX-imi ilinniartup ilinniarnini naammassisimavaa

Junip arfineq aappanni 2021 eGUX-imi ilinniartoq siulleq ilinniakkaminik naammassinnippoq. Tassaavoq Regine Villadsen nunaqarfimmit Ilimanameersoq, taannalu ukiut marluk ilinniarnertuunngorniareerluni ilinniakkaminik naammassinnippoq.

Regine Villadsen Johansen nunaqarfiup atuarfiani Ilimanami ningiuuvoq. Marlunnik meeraqarpoq ulluinnarnilu ilinniartitsisuulluni. Unnukkuunerusoq ilinniarnini ingerlassimavaa. Anguniagarisimavaa ilinniartitsisunngorusulluni ilinniarsimasoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter Olsenip nasartaartoq pilluaqquaa.

- Regine, nasartaarninni pilluangaarit. Ukiut marluk ilinniarnertuunngorniarneq ingerlassimavat, sumiluunniit nunaqaraluaraanni ingerlanneqarsinnaasoq. Ilinniarnerit pingaartumik unnukkut ingerlattarsimavat, tassuunakkullu piginnaaneqarnerit piumassutsillu takutissimavat annertooq. Tamanna tulluusimaarutigissavat. Inuppassuarnut matumik ammaavutit, angerlarsimaffimminniit ilinniarusuttunik. Nunarput sukkasuumik ineriartorpoq, taamaattumik aamma pingaaruteqarpoq amerlasuut ilinniagaqarnissaat. Tamanna nunatta pisuunnguutissaraa. Aammaarlunga Regine nasartaarninni pilluangaarit, Naalakkersuisoq Peter Olsen taama oqarpoq.

eGUX sunaava?
Inunnut angerlarsimaffimminniit atuarusuttunut eGUX-imik pikkorissarnerit ilinniarnerillu neqeroorutaapput. eGUX aqqutigalugu ilinniarnerit eqaatsumik ingerlassinnaavat, ulluinnarni inuunernut ilinniarnerit ilinniagaqarnerillu ataqatigiisissinnaagakkit – illit aamma soorlu ilaquttatit illoqarfigisanniit nunaqarfigisanniillu nuunngikkaluarlusi.

eGUX GUX Sisimiut ataanniippoq ilinniarnerullu allaffissornertaa GUX Sisimiuni inissisimavoq.

eGUX august 2019 ukiuni marlunni ilinniarnertuunngorniarfittut aallartippoq. Anguniagaavoq eGUX-ip qulakkeerinninnissaa, ilinniarnertuunngorniarfimmi fag-it sumiluunniit najugaqaraluaraanni, qassinik ukioqaraluaraanni ilaqutariittullu qanoq inissisimagaluaraanni ingerlanneqarsinnaasut.

eGUX inersimasunut eqaannerusumik ilinniarusuttunut tulluussagaavoq, saniatigullu aamma immikkut pisariaqartitsisunut qinnuteqartunut atorluarneqarsinnaalluni. eGUX-imi ukiumut 100-jut missaat ilinniarnertuunngorniarlutik aallartittarput.

Suliniut pitsaasumik kinguneqarsimasoq ilinniarnerup takutippaa taamaalilluni ilinniagaqarusuttunut arlaqarnerusunut sunniuteqarsimalluni, tassani eqqorneqarmata ilinniartikkusutavut siuliani angunngitsoorsimasavut. Saniatigut eGUX-i qarasaasiakkut atuartitsinermi ilinniartitaanerup iluani maligassiuivoq.

Annertunerusumik paasisaqarusunnermi saaffigineqarsinnaavoq Naalakkersuisumut allatsi Paninnguaq Steenholdt oqarasuaat +299 34 57 02