Pissutsit nalinginnaaleriartorput

Ippassaq Naalakkersuisut tusagassiortunik katersortitsineranni oqaatigineqareersutut sillimaffissat, tallimanngornermiit ataasinngornermut atuutsinneqartut unnuap qeqqanut atorunnaartut. Tamanna nalunaarutit nutaat, ullumikkut Kalaallit Nunaat tamakkerlugu atuuttussat atuutsinneqalernerinut peqatigitillugu pivoq.

Taakku ilinnut Nuummi najugaqartumut qanoq isumaqarpat?

Nuummi pissutsinik misissuinermut peqatigitillugu tuniluuttoqarsinnaanera killilerniarlugu isumannaallisaanermi iliuuserisatut innuttaasut misissuiffigineqarput. Tamanna oqartussaasut pissutsinik naammaginartumik paasisaqarsinnaanerinut ilaatinneqarpoq, aammalu suliffeqarfiup pineqartup iluani tuniluunnerup ingerlaarneranut tikkuussilluni.

Taamaattumik illiuutsit, coronavirusip tuniluunneranik killiliinissamut iluaqutaasinnaasut, taamaalillunilu tuniluuttoqaqqinnissaanik pinngitsoortitsisinnaasut atorunnaarsinneqassasut politikkikkut ataatsimoorfiusumik aalajangerneqarpoq. Tamatuma kingunerisaanik neriniartarfiit, bussit, oqaluffiit, timigissartarfiit niuertarfiillu qanermut assiaquteqarnissamik inunnillu killilersuinissamik piumasaqaateqarfiunngitsumik matutik ammarsinnaalerpaat.

Suliffeqarfimmi pineqartumi tuniluunneq killilerneqarmat, aamma “aaqqissuussinernut il.il., nunanit allanit tikittunit peqataaffigineqartunut inerteqquteqarneq”-mik saneqqutsisinnaanermut akuersissummik atuutsitsisoqalerpoq.

Taamaalilluni aamma Nuummi aaqqissuussinernik katersuunnernillu, kommuninit allanit peqataaffigineqartunik ingerlatsisoqaqqissinnaalerpoq.

Angalassaguit tikinnissamut maleruagassat nutaat misissukkit

Ullumikkut tikinnissamut katersuunnissamullu nalunaarutini qasukkaanissat nutaat Naalakkersuisunit akuerineqarput. Qasukkaanerni nutaani pingaartumik inuit akiuussutissanik kapuinermi naammassinnissimasut pineqarput, taakkulu 1. juni 2021 aallarnerfigalugu atuutilissapput.

Ullumikkumiit 1. juni 2021-mi atuutilersumik inuit akiuussutissanik kapuinermi naammassinnissimasut ullormi ataasiinnarmi angerlarsimaannarsinnaalissapput, aammalu tikinnermiit ullut tallimassaanni pinnatik, misissuisarfik ammappat aqagukkut misissorteqqittalissallutik.

Meeqqat marlunniit 11-inut ukiullit angalaqataasut tikeqatitik assigalugit Covid-19-imut misissortinnissamut neqerooruteqarfigineqartassapput. Tassalu assersuutigalugu angajoqqaat akiuussutissanik kapuinermi naammassinnissimasut aamma meeqqat angalaqataasut tikinnerminni aqagukkut misissortissinnaapput, naak meeqqat ukiunik 11-nik qaammatinillu 8-nik utoqqaassusillit kapitissimanngikkaluartut. Meeqqat marluk inorlugit ukiullit tikinnissaminnut Covid-19-imik tuunillatsissimannginnermut uppernarsaammik takutitsinissaannut piumasaqaat aamma atorunnaarpoq. Taamaattumik aamma meeqqat taakku tikinnissaminnut Covid-19-imut misissortittariaarupput.

Akiuussutissanik kapuinermik naammassinnissimaneq qanoq isumaqarpa?

Erseqqissassallugu pingaaruteqarpoq, qasukkaanerni arlalinni ”akiuussutissanik kapitissimaneq” atornagu, oqaaseq ”akiuussutissanik kapuinermik naammassinnissimaneq” atorneqarmat. Tamanna aalajangersakkanut taaneqartunut ilaassagaanni akiuussutissaq, soorlu Moderna-meersoq imaluunniit Pfizer-imeersoq atorlugu marloriarluni kapitissimanermik isumaqarpoq. Kapitinnissanit marluusunit taamaallaat siullermeerluni kapitissimagaanni, maleruagassat nalinginnaasut malinneqartussaapput.

Inuit akiuussutissanik kapuinermi naammassinnissimanngitsut, kisiannili siusinnerusukkut Covid-19-imik tgunillatsissimasut qasukkaanernut taakkununnga ilaatinneqanngillat, taamaattumillu maleruagassanik nalinginnaasunik malinnittussaallutik.

Silaannakkut angallatinut ilaasinnaasut amerlanerpaaffissaat qaffanneqarpoq

Tamatuma saniatigut Corona pillugu Allattoqarfimmiit Air Greenlandimut ilisimatitsissutigineqarpoq, 1. juni aallarnerfigalugu Imarpik qulaallugu timmisartup aallarnerani ataatsimi inuit 270-it tikillugit ilaasinnaasut, maanna aallarnermi ilaasut amerlanerpaaffissaat 200-uugaluartoq.

Air Greenlandip saniatigut timmisartuutileqatigiiffinnut allanut, Kalaallit Nunaannut ilaasoqarnissaminnik kissaateqartunut ilaalluni tikinnissamut piumasaqaatit suli atuuttussaapput, taamaattumillu timmisartuutileqatigiiffiit taakku suli tikinnginnerminni ilaasoqarnissamut akuersissummik qinnuteqartussaapput akuerineqarsimasussaallutillu.

Sillimaffissat

Piffissami aggersumi Kalaallit Nunaannut tikittartut amerlissasut ilimanaateqarpoq. Tamatuma kingunerisaanik Covid-19-imik tunillatsissimasunik amerlanerusunik tamaanga tikittoqartalernissaa ilimanarpoq. Oqartussaasunik timmisartuussinerit atorunnaarsinneqarnerini aammalu tikittartut amerlinerini Kalaallit Nunaannut tuniluunnermik tikittoqarnissaanut ulorianartorsiorneq annerulissaaq, taamaattumillu tikittartut tamarmik angerlarsimaannartussaatitaanermut aalajangersakkanik malinninnissaat pingaaruteqarluinnarpoq.

 

Tamanna pissutigalugu innuttaasut tamarmik piffissami aggersumi sillimaffissanik, tuniluuttoqalersinnaaneranik annikillititsisussanik tamanik eqeersimaarfiginnissasut inassutigineqarpoq:

 

  • Qanillinaveersaarit tikitaqarnaveersaarillu.
  • Assatit errortorluartakkit.
  • Ersiuteqaruit angerlarsimaannarit, misissortinniarlutillu erngerlutit najukkanni peqqinnissaqarfik oqarasuaatikkut attaveqarfigiuk.

 

Paasissutissat amerlanerusut corona.nul.gl imaluunniit corona.gl aqqutigalugit pissarsiarisinnaavatit. Apeqqutissaqaruit coronamut hotline tlf. 80 11 00-imut ulluinnarni nal. 8-16 akornanni imaluunniit corona@nanoq.gl aqqutigalugu attaveqarfigiuk.