Meeqqat ulluata akisussaaffitsinnik eqqaasissavaatigut

Nunat tamat meeqqanut ullorititaanni meeqqat pisinnaatitaaffii nalliuttorsiutigaagut. Meeqqat ineriartornerat atugarissaarnerallu suliniuteqarfissatut pingaarnerpaatut naalakkersuisooqatigiit inississimavaat taamaammallu meeqqat ulluinnaat pitsaanerulersinniarlugit ullut tamarluinnaasa sulisarlutik.

Nunatsinni meeqqanut tamanut Naalakkersuisut manna ilassinnissutigaat:
Kalaallit Nunaanni meeqqat pitsaasumik inuuneqassapput. Tamanna atuarfinni, sunngiffinni angerlarsimaffinnilu atuutissaaq. Atuarfik pitsaasunik avatangiiseqartitsissaaq, sunngiffimmi nuannersunik suliassaqassaaq angerlarsimaffiillu toqqissisimanartuullutillu nuannersuussapput. Ullumikkut meeqqat tamarmiunngitsut pitsaasumik inuuneqarput tamannalu akuerineqarsinnaanngilaq. Atugassarititaasut allanngortikkusuppagut, taamaalilluni ullumikkut meeraaneq ippassamut naleqqiullugu pitsaanerulersissavarput.

Meeqqat ulluannut atatillugu inersimasunut Naalakkersuisut aammattaaq massuminnga ilassinnissuteqarput:
Sulinermi tamarmi meeqqanut atugassarititaasut pitsanngorsarneqarnissaat Naalakkersuisut aallaavigaat. Kinguaariit tulliuttut siunissaq pigaat aamma ullumimut naleqqiullugu pitsaanerusumik aallaaveqarnissaasa qulakkeerneqarnissaa pisariaqartinneqarpoq. Killissarititaasut pitsaasut pigeriikkavut pitsanngorsassavagut ineriartortillugillu, killissarititaasut atorneqarsinnaajunnaarsimasut allanngortissavagut. Taamaammat Naalakkersuisut sulinissaminnut siunertaminni siuariartornermik pilersitsissapput kinguaassatsinnullu iluaqutaasussamik aqqutissiuissallutik.

Qujanartumik meeqqat amerlasuut atugarissaarput. Meeqqat ullut tamaasa illartartut. Meeqqat ullut tamaasa aalasartut aamma meeqqat ullut tamaasa nutaanik ilinniagaqartartut. Taamaattoqarneranut ilaatigut nunatsinni perorsaasut, ilinniartitsisut, timersoqatigiiffiit, ningiukkut/ittukkut/aanaakkut/aataakkut allarpassuillu qujassutissaqarfigaagut. Nuannaarneq tuniluuttarpoq – aamma meeqqanut pitsaasumik inuunermik pilersitsinissamik suliaqarnermi inersimasut amerlanerusut peqataanissaat neriuutigaarput. Akisussaaffik assigiinngitsorpassuarnik iluseqarluni takkuttarpoq, pinngortitaq pitsaasooqqullugu eqqiluillunilu pinnguarfissaaqqullugu eqqagassanik katersinermiit kajumissutsimik tunngaveqarluni suleqataanissamut nalunaarnermut. Aamma inuttut akisussaaffik annertooq inersimasuni tamaniippoq: iliuutsigut allanik ajoqusiissappata ikiorneqarnissaq ujartussagipput, naak isumaqatigiinnginneqaraluartoq avatangiisitsinnik ataqqinninnissarput ilungersuutigissagipput. Tassami oqaasiinnaat kinguaariinnut tullernut ingerlateqqinneqarneq ajorput, iliuutsigut aamma ingerlateqqinneqartarput.

Meeqqat ulluat kikkunnut tamanut nuannersuunissaa Naalakkersuisut kissaatigaat.

Paasisaqarnerorusukkuit Julie Præst Wilche uunga e-mailimut attavigiuk: JPRW@nanoq.gl