Mannissarniarnermut maleruagassat pillugit eqqaasitsissut

Timmissanik illersuineq piniarnerlu pillugit Namminersorlutik Oqartussat nalunaarutaat nr. 17, 28. oktober 2019-imeersoq malillugu mannissarniarnermut maleruagassat atuuttut Aalisarnermut Piniarnermullu Naalakkersuisoqarfimmiit matumuuna eqqaasitsissutigineqassapput.

 

Inuit piniarnermut atuuttumik allagartaqartut imaluunniit akiliuteqarluni piniartitsinermik aaqqissuussisartumit akuerisaasumit angallanneqartut kisimik timmissat manniinik katerseqqusaapput. Mannissarniarneq taamaallaat timmissanit piffissamik mannissarfiusussamik aalajangersaaffigineqartunit pisassaaq taamaallaallu timmissanut pineqartunut piffissap mannissarfigeqqusaasutut aalajangersarneqartup iluani.

 

Nalunaarummi § 11 malillugu qaqulluit, tulukkat, naajarujussuit aamma naajarluit manniinik mannissarniartoqaqqusaavoq, taamaallaalli nammineq atugassanik. Taassuma saniatigut Zone 1-mi aamma 4-mi appaliarsuup manniinik ukioq kaajallallugu mannissarniartoqaqqusaavoq (ilanngussaq nunap assingalik takuuk). Mittarfeqarfiit kommunilluunniit Aalisarnermut Piniarnermullu Naalakkersuisoq akuersiseqqaarnagu mittarfiit, eqqaaviit eqqaavissuillu eqqaanni tulukkat naajallu akornutaanerannut atatillugu manniinik katersisitseqqusaapput.

 

Naajat manniinik tuniniaaneq eqqarsaatigalugu eqqaasitsissutigineqassaaq inuussutissarsiutigalugu piniarnermut allagartallit kisimik ooqanngitsunik suliarineqanngitsunillu naajat manniinik atuisunut tuniniaaqqusaasut taamaallaallu aqutsiveqarfimmi najugaqarfigisami.

 

Manniit katersukkat Aalisarnermut Piniarnermullu Naalakkersuisoqarfimmut ukiumoortumik nalunaarutigineqarnissaat nammineerluni www.sullissivik.gl aqqutigalugu nalunaarsuinikkut imaluunniit piniakkanut nalunaarsuisarfik Piniarneq aqqutigalugu immersugassap immersukkap nassiunneratigut pisassaaq.

 

Maleruagassat qulaani taaneqartut unioqqutinneqarpata Kalaallit Nunaannut Pinerluttulerinermik inatsit malillugu akiliisitsisoqarsinnaavoq arsaarinnittoqarsinnaallunilu.  

 

 

Sukumiinerusumik paasisaqarusukkaanni attavissaq: Amalie Jessen, Aalisarnermut Piniarnermullu Naalakkersuisoqarfik, tlf.: 34 53 04, e-mail: amalie@nanoq.gl