Nuummi COVID-19-ip tuniluunnera pillugu nutaarsiassaq

Munck-ip sulisunut inissiisarfiani covid-19-imik tunillatsissimasut katillugit pingasut nassaarineqarput. Inissiisarfiup avataani, aammalu inissiisarfimmeersut neriniartarfinnut, imerniartarfinnut il.il. isernerminni qanillisaasa misissortittut akornanni tunillatsissimasunik allanik nassaartoqanngilaq.

Tunillatsissimasinnaasunik ujarlerneq aammalu tunillatsittut pingasut nutaat qanillisimasaanik paasiniaaneq ingerlavoq. Ataatsimut isigalugu Munck-ip inissiisarfiata avataani tunillatsittoqarsinnaanera qaangiuttutut isikkoqarpoq – naak suli illoqarfimmi ilisimaneqanngitsunik tuniluuttoqarsinnaammat malunniutaasinnaasut eqqumaffigineqartussaagaluartut aammalu pinaveersaartitsinermut innersuussutit malinneqartussaagaluartut.

Nuummi inuit 400-t misissorneqarput, aammalu misissugassatut katersukkat misissoqqissaarneqarneri unnuaq nal. 00,30 naammassipput. Suliaq tamaat isigalugu annertuvoq, inunnut paasissutissiinerit, misissugassatut tigusat amerlassusii tamatumalu kingorna misissueqqissaarnerit ingerlanneqarneri eqqarsaatigalugit – kisiannili suliassat tamarmik naammassipput.

Ullumi kingusinnerusukkut paasisat nutaanerpaat pillugit itisiliiffiusumik tusagassiortunik katersortitsisoqassaaq.