Kuannersuarnut piffissaq tusarniaaffiusoq sivitsoqqinneqarpoq Septembarip 13-iata 2021 tungaanut

Kuannersuani aatsitassarsiorfissamut piffissap tusarniaaffiusup 13. september 2021 tikillugu sivitsorneqarnissaa Naalakkersuisut akueraat.

Inatsisartunut qinersineq aammalu Naalakkersuisunik nutaanik toqqaaneq pissutigalugit ulloq 1. juni tusarniaanermut piffissaq naannginnerani politikerinik peqataasoqarluni tusarniaalluni ataatsimiititsinerit ingerlanneqarsinnaasimanngillat. Tamatumunnga ilaatigut pissutaavoq tusarniaalluni ataatsimiititsinerit minnerpaamik ullut 14-it sioqqullugit ilimasaarutigineqartussaanerat, tamannalu ajornarsimavoq. Ulloq 13. september 2021 tikillugu tusarniaanermut killiliussap kinguartinneqarnerani sapaatit akunneranni 34-mi amma 35-mi tusarniaalluni ataatsimiititsinerit ingerlanneqarsinnaanerat periarfissinneqassaaq.

Tusarniaalluni ataatsimiititsinerit Igalikumi, Nanortalimmi, Narsami, Narsarsuarmi, Qaqortumi aamma Qassiarsummi ingerlanneqassapput.

Naatsorsuutigineqarpoq Naalakkersuisunut ilaasortat makkua peqataassasut:
  • Ineqarnermut, Attaveqatigiinnermut, Aatsitassanut Naligiissitaanermullu Naalakkersuisoq Naaja H. Nathanielsen,
  • Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund kiisalu
  • Peqqissutsimut Naalakkersuisoq Kirsten L. Fencker.
Piffissaq tusarniaaffiusoq maannakkut katillugit sapaatit akunnerisa 38-t missaannik sivisussuseqalissaaq.

Tusarniaanermut paasissutissat uani atuarneqarsinnaapput: Linki tusarniaasitsinermut