Nuummi Covid-19-imik tunillatsissimasoq nutaaq

Marlunngorneq ulloq 25. maaj 2021 inuit marluk imminnut attavigisimanngitsut tikereernermi ullut tallimassaani misissorteqqinnermi tunillatsissimasut paasineqarput – sisamanngornermilu 27. maaji  inuk alla sulinikkut attuumassuteqartoq covid-19-imik tunillatsissimasoq paasineqarpoq. Tuniluunnerup paasiniarneqarnissaanut suliniutit pisariallit aallartinneqareerput. Tamanna pillugu ataavaartumik ilisimatitsissutigineqartarumaarpoq. 

Aaqqissuussinerit katerisimaarnerillu

Aaqqissuussinerit pillugit nalunaarummi oqaatigineqarpoq Covid-19-imik tunillatsissimasumik nassaartoqarpat, illoqarfimmi pineqartumi ulluni tulliuttuni 30-ni aaqqissuussinernik il.il. ingerlatsisoqaqqusaanngitsoq, tassani nalinginnaasumik piumasaqaataappat imaluunniit naatsorsuutaappat aaqqissuussinermik il.il. ingerlatsinissamut atatillugu kommuninit allanit peqataasunik tikittoqarnissaa. Inerteqqulli tamanna peqqissutsimut aarlerinaateqanngippat Nunatta Nakorsaaneqarfiata immikkut akuersissuteqarfigisinnaavaa.

Pisimasumut tunngatillugu inaarutaasumik tamakkiisumillu aatsaat ullut tulliuttut ingerlanerini paasisaqartoqassaaq. Inaarutaasumik paasisaqartoqareerpat Nunatta Nakorsaaneqarfiata inerteqqut immikkut akuersissuteqarfigineqarsinnaanersoq aatsaat nalilissavaa. Nunatta Nakorsaaneqarfia allamik nalunaaruteqanngippat inerteqqut soorunami atuutissaaq.

Angerlarsimaannaqqusaanermut aalajangersakkat maleruagassallu allat malinneqarnissaat pingaaruteqarpoq

Innuttaasut tamarmik tunillaassuuttoqarnissaanut aarlerinaatit annikillisinniarlugu maleruagassanik malinninnissaq eqqumaffigilluinnarnissaa innersuussutigineqarpoq:

  • Qanillinaveersaarit.
  • Assavit eqqiluitsuutinnissaat eqqaamajuk.
  • Nappaammut ersiuteqaruit angerlarsimaannarit, misissortinnissarlu siunertaralugu erngertumik najukkanni napparsimaveqarfik attavigiuk.

Apeqqutissaqarnermi corona hotline attaviginissaanut tikilluaqqusaavutit uunga tlf. 80 11 00 imaluunniit corona@nanoq.gl