USA-p nunanut allanut naalakkersuisuat tikeraarnera niueqatigiinnerulernissamik ammaavoq

Kofod Múte Blinken Broberg Naalakkersuisut Siulittaasuat, Múte Bourup Egede aamma Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg amerikamiut nunanut allanut ministeriat Antony Blinken Kangerlussuarmi ataatsimeeqatigivaat, ilaatigullu oqaluuserivaat USA-p Kalaallit Nunaatalu akunnerminni niueqatigiinnerup annertusarneranut periarfissat.

Naalakkersuisut Siulittaasuata, Múte Bourup Egedep Naalakkersuisoq Pele Broberg peqatigalugu amerikamiut nunanut allanut ministeriat Kangerlussuarmi tikilluaqquaat. Tikeraarneq pingaarutilimmik oqariartuuteqarpoq, tassa Kalaallit Nunaat USA-mut suleqataasoq pingaarutilik. Naqissuserneqarporlu USA-p Kalaallit Nunaatalu akornanni annertunerusumik niueqatigiinnissamik piumassuseqartoqartoq. Tamanna isumaqarpoq nunanut allanut politikkikkut piffissamut ungasissumut ataavartoqarnissaanik piumassuseqartoqarneranik.

Amerikamiut nunanut allanut ministeriata Kalaallit Nunaannut tikeraarnera ivertinneqarnerminiit angalanerata aatsaat tallimassarivaa.

”Nunanut allanut ministerip naalakkersuinermik tigusereernerup kingorna taamak siusitsigisumi Kalaallit Nunannut tikeraarneratigut amerikamiut pingaaruteqarluinnartumik oqariartuuteqarput. Taamaattumik uannut pingaaruteqarluinnartuuvoq Naalakkersuisut pingaartitaannik aammalu qanoq USA-mik suleqatigiittoqarsinnaaneranik oqariartuuteqassallunga tamatsinnut iluaqutaasumik.”
– Naalakkersuisut Siulittaasuat Múte Bourup Egede oqarpoq.

USA-mik niueqatgiiinnerup ineriartortinnissaanik pisariaqartitsinerup Naalakkersuisunit pingaartinneqarnera saqqummiunneqarpoq. Tamannalu isigineqassalluni ullumikkut niueqatigiinneq killeqarmat aammalu annerusumik suleqatigiinnissamik pilersitsinissamik periarfissaqarmat. Oqariartuutigineqartorlu amerikamiut nunanut allanut ministerianit tigulluarneqarpoq. USA-lu attaveqaatitta nukittorsarnissaanut suleqatigiinnissamut piareersimavoq.

”Nuannaarutigivara Nunanut allanut minister Blinkenip nunarput kiisalu suut neqeroorutigisinnaanerigut nammineerluni takunissaanut periarfissaqarsimammat. Qilanaaraaralu ullumikkut tikeraarnerup USA-mik niueqatigiinnermi suliatsinnik aallartitsisuunissaa kiisalu Ataatsimut Suleqatigiinnissamik Pilersaarutitta Issittumi sakkuaannetaqanngimmik ineriartorneq aallaavigalugu piviusunngortinneqarnissaa.”
– Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg oqarpoq.

Amerikamiut naalakkersuinikkut ingerlatsisuisa nutaat aamma oqaatigivaat silap pissusaanut annerusumik ukkatarinninnissartik. Tamannalu nutaarsiassaavoq nuannersoq, tassamik nunat tamalaat akornanni annerusumik silaannaap pissusaata allanngoriartorneranut iliuuseqarnissaq pisariaqarpoq.

”Maannakkut sulilluta aallartissinnaanngorpugut, Kalaallit Nunaannut USA-mullu iluaqutaasussanik inerisitaqarsinnaanngorluta.”
- Pele Broberg naggasiivoq.

Pressemødet

Attaveqarnermi paasissutissat:
Uiloq Mathæussen, Naalakkersuisut Siulittaasuata naalakkersuisoqarfiani tusagassiornermi siunnersorti, tlf. +299 34 51 28 / +299 22 85 02, e-mail umat@nanoq.gl

Juno Berthelsen, Nunanut Allanut, Inuussutissarsiornermut, Niuernermut Silallu Pissusianut Naalakkersusumut allatsi tlf. +299 26 73 72 / +45 53 12 89 72, e-mail: jube@nanoq.gl