Sumiiffinni tassaarsuaqarsinnaaneranik aarlerinaateqarfiusuni innuttaasut nuunnissaat pillugu saaffiginnissutit

Karrat Kangerluanni tassaarsuaqarsinnaanerata aarlerinaateqarnera pillugu ersarinnerusumik naatsorsuinerit pillugit, oqartussat kommunilu peqatigalugit Naalakkersuisut 2021-mi maajip 11-anit 14-ata tungaanut paasissutissiillutik ataatsimiisitsipput.

Innuttaasut illoqarfimmut allamut, najukkamulluunniit allamut nuunnissaminnik kissaateqartut Avannaata Kommunianut saaffiginnissuteqassasut, Namminersorlutik Oqartussat aamma Avannaata Kommunia isumaqatigiipput. Saaffiginninnerit tulliuttumut pissapput:

E-mail: katastrofe@avannaata.gl imaluunniit sianerfissaq 38 78 41 (ammasarfiit 9.00-15.00)

Innuttaasup illoqarfimmut allamut, pisortalluunniit attartortittagaataanni najukkamut allamut nuunnissaminik kissaataa kommunip malitsigisaanik nalunaarsussavaa.

Innuttaasut kommunimut saaffiginninnerminni tulliuttut ilisimatitsissutigissavaat:
  1. Inoqutigiit najukkami najugaqartutut inuit allattorsimaffianni allassimanersut
  2. Inoqutigiit qanoq amerlatiginersut
  3. Inissiap qanoq angitiginissaanik kissaatigineqartoq
  4. Inoqutigiit sumut nuunnissaminnik kissaateqarnersut
  5. Inissiamik attartortittakkamik neqeroortoqarnissaata tungaanut inissinneqarallarnissaminnik inoqutigiit kissaateqarpat?
  6. Inoqutigiit qanoq piaartigisumik nuukkusuppat
Malitsigisaanik INI A/S suleqatigalugu kommuni saaffiginnissutinik ataqatigiissaarillunilu suliat suliarissavai.

Nammineq inigisassamik innersuussisoqarnissaata tungaanut inoqutigiit attartorallarsinnaasaannik neqeroorfigineqarsinnaapput – illoqarfimmi nunaqarfimmiluunniit allami inissianik najorneqanngitsunik inissianiusinnaavoq.

Inissiamik attartortittakkamik najorneqanngitsumik innersuussassaqartillugu aatsaat, nammineq inigisassamik tunniussisoqarsinnaammat oqaatigissallugu pingaaruteqarpoq

Annertunerusumik paasisaqarusukkuit Avannaata Kommunia katastrofe@avannaata.gl-imut, oqarasuaat 38 78 41-imut saaffigiuk. (ammasarfiit 9.00-15.00)