Silap ulorianartorsiortitsisinnaanera pillugu pitsaanerusumik siulittuineq

Kalaallit Nunaanni silasiorneq, Danmarks Meteorologiske Institut-ip (DMI-p) ineriartortileruttorpaa. DMI-p piffissami 2021-mit 2024 tikillugu Kalaallit Nunaanni suliassaanut, Folketingip ukiumut 1 mio. koruuninik aningaasaliineratigut tamanna pivoq.

Kalaallit Nunaanni silap ulorianartorsiortitsisinnaanera pillugu aarlerisaarinermi systemimik, DMI ukiuni tulliuttuni pilersitsiniarpoq. Ulussaarsuarnissaa/anorersuarnissaa, annertuumik apinissaa, sermernarnissaalu pillugit, DMI siullertut aarlerisaaruteqartassaaq. Piterarnissaa pillugu DMI-p aarlerisaarisarnera, aarlerisaarinermi systemimut ilanngunneqassaaq. Tamatuma saniatigut issangiarnissaa/qerinnarnissaa, aputillu sisooratarsinnaanera pillugit siulittuuteqartarnerup, aarlerisaaruteqartarnerullu ineriartortinneqarnissaasa aallarnisarnissaannut aningaasaliissutit ilaat atussallugit DMI-p pilersaarutigaa.

Silassaq pillugu Kalaallit Nunaanni innuttaasunut pitsaanerusumik attaveqalernissani anguniarlugu, DMI 2021-mi marsip qaammataani Facebook-imi quppernermik pilersitsivoq
Aarlerisaarinermi systemissap pilersinneqarnissaanut atatillugu, DMI aasamut nittartakkatigut workshoppertitsiniarpoq. Tassani ilaatigut Kalaallit Nunaanni oqartussat, upalungaarsimanermilu suliallit, aarlerisaarinermi systeminut isummersuutaat katersorneqassapput.

Silap ulorianartorsiortitsisinnaanera pillugu innuttaasunut aarlerisaarineq upalungaarsimanerlu, assersuutigalugu piniarnermut aalisarnermullu, allatigullu asimiinnermut atatillugu ajunaartoqarnissaanut, inuullu inuuneranik naleqarnissaanik pinaveersaartitsisinnaavoq. Tamanna pillugu Ineqarnermut, Attaveqatigiinermut, Naligiissitaanermullu Naalakkersuisoqarfiup DMI-mut attaveqartuusup, aningaasaliissutigineqartut nuannaarutigai.

Ajunaartoqassagaluarpat, malitsigisaanik annaassiniarnissaq Kalaallit Nunaanni Politiit aamma Issittumi Sakkutooqarfiup isumagisassaraat. Annaassiniarnermi iluaqutaasinnaasumik silassaq pillugu paasissutissiisartumit DMI-mit, upalungaarsimaneq tapersersorneqarpoq.

DMI-p nalilerpaa, siunissami sulinissaq siulittuuteqartarnissamut pitsanngorsaataassasoq, ajunaartoqarnissaalu pinaveersaartinneqarsinnaalluni, inuullu inuuneranik annaassinermik kinguneqarsinnaalluni upalungaarsimanerup nukittorsarneqarnissaanut tunngavissiissasoq. Taamaattumik suliniutit pitsaanerpaamik sunniuteqarnissaat qulakkeerumallugu, DMI kiisalu Ineqarnermut, Attaveqatigiinermut, Naligiissitaanermullu Naalakkersuisoqarfik kiisalu upalungaarsimanermik suliallit ataavartumik oqaloqatigiittarput.

Paasissutissanik annertunerusunik pissarserusukkit Ineqarnermut, Attaveqatigiinermut, Naligiissitaanermullu Naalakkersuisoqarfimmut box909@nanoq.gl-imut imaluunniit Danmarks Meteorologiske Institut-imut presse@dmi.dk-mut saaffiginnissuteqarsinnaavutit.