Erngup nukinga mingutsitsinngitsunut allannguinissamut siuarsaataassaaq

Naatsorsukkat nutaat takutippaat, erngup nukinganut aningaasaliinerit inuiaqatigiinni ingerlatsinermilu aningaasaqarnermut imminnut akilersinnaasut. Innaallagissiorfiit nukissiamik mingutsitsinngitsumik imminut pilersornermik annertusititsissapput aammalu CO2-mik aniatitsinermik annikillisitsissallutik.

Erngup nukinganik innaallagissiorfiit inuiaqatigiinni ingerlatsinermilu aningaasaqarnermut imminnut akilersinnaapput
Erngup nukinganik innaallagissiorfiit pillugit inatsisissamut missingiut tamanut ammasumik tusarniaassutigineqarlutik nassiunneqarput. Inatsisissap Inatsisartut ukiakkut ataatsimiinneranni suliarineqarnissaa naatsorsuutigineqarpoq.

Qasigiannguit Aasiaallu pilersorneqarnerini erngup nukinganik innaallagissiorfimmik nutaamik sananissaq, kiisalu Nuup eqqaani Utoqqarmiut Kangerluarsunnguanni erngup nukinganik innaallagissiorfiup allineqarnissaa inuiaqatigiinni aningaasaliinertut pitsaasutut naliliiffigineqarput.

”- Erngup nukinganut aningaasaliinissat siunnersuutigineqartut pingaaruteqarput. Aningaasaliissutit taakku immitsinnut nukissiamik mingutsitsinngitsumik pilersuinitsinnik annertusititsisussaapput, CO2-mik aniatitsinitsinnik annikillisitsisussaapput tamatumalu peqatigisaanik Nukissiorfiit aningaasaqarnerannik pitsannguisussaallutik”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Naatsorsukkat nutaat sinneqartoortoqarnissaanik takutitsipput
Inatsisissamut sunnersuummik nutaamik suliaqarnermut atatillugu nutaanik naatsorsuisoqarpoq. Siusinnerusukkut naatsorsuutit takutippaat, Qasigiannguit Aasiaallu pilersorneqarnerinut erngup nukinganik innaallagissiorfimmik nutaamik sananissaq inuiaqatigiit aningaasaqarnerat eqqarsaatigalugu amigartooruteqarfiussasoq. Naatsorsukkat nutaat inerneri allanik takutitsipput, tassani ilaatigut erngup nukinganik innaallagissiorfiisa piffissat atorsinnaaffii tamakkerlugit naatsorsukkanut ilanngunneqarmata. Taamaalilluni aningaasaliinermi pissarsiat tamarmiusut ilanngullugit naatsorsorneqarput, tamannalu maanna naatsorsukkat sinneqartoorfiunissaannut peqqutaavoq pingaarneq.

”- Nunatsinni nukissamik ataavartumik isumalluutinik atuinerup annertusineqarnissaa isumalluarnartorujussuuvoq, aammalu isumalluutinik taakkuninnga atuinermi avatangiisit aningaasaqarnerlu eqqarsaatigalugit pissarsiassaqartoqarpoq. Inatsisissatut siunnersuummi nukissiuutit mingutsitsinngitsut amerlineqarnissaat siunertarineqarpoq”, Naalakkersuisoq Kalistat Lund naggasiivoq.

Naalakkersuisooqatigiinnissamut isumaqatigiissummi erngup nukinganik innaallagissiorfimmik, Qasigiannguanut Aasiannullu pilersuisussamik nutaamik sananissaq, kiisalu Nuup Eqqaani Utoqqarmiut Kangerluarsunnguanni erngup nukinganik innaallagissiorfiup allineqarnissaa nukissiuutit mingutsitsinngitsut atorlugit tunisassiornissamut aalajangersimasumik alloriartoqarnissaa taaneqarpoq.

Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisoqarfimmut pisortaaneq Mette Skarregaard Pedersen oqarasuaammut: 346476 / 529844 imaluunniit e-mail: mesp@nanoq.gl imaluunniit pan@nanoq.gl