USA-p Nunanut Allanut Naalakkersuisuat Antony Blinken tikeraalersoq

Naalakkersuisut Siulittaasuat Múte Bourup Egede aamma Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg USA-p Nunanut Allanut Naalakkersuisuat Antony Blinken naapissavaat

Antony Blinkenip Kalaallit Nunaat maajip 20-anni 2021-mi tikeraarpagu, Múte Bourup Egede Kangerlussuarmi tikilluaqqusisuussaaq. Tikeraarnerup pingaarnertut siunertaraa USA-p Kalaallillu Nunaata akornanni attaveqarneq pitsaasoq naqissueqqissallugu, illugiillunilu suleqatigiinnerup ingerlaqqinnissaa oqaloqatigiissutigissallugu.

”Antony Blinkenip Nunatsinnut tikilluaqqunissaa qilanaaraara. Tamatuma saniatigut nunap isorartoorsuup kimmut sanilerisatta suleqatiginerata kingumut peqatigiilluta qanoq ineriartortinneqarnissaa oqaloqatigiissutigissallugu aamma qilanaaraara. Ingammillu qilanaaralugu aningaasarsiornikkut kulturikkullu atassuteqatigiinnerput nunagisatta akornanni qanoq siuarsarsinnaanerlutigu oqaloqatigiissutiginissaa” Múte Bourup Egede
oqarpoq.

USA-mi Nunanut Allanut Naalakkersuisuata Antony Blinkenip Kalaallit Nunaat tikeraartinnagu, Nunanut Allanut, Inuussutissarsiornermut, Niuernermut Silallu Pissusianut Naalakkersuisup Pele Brobergip Danmarkimi maajip 17-ianni naapissavaa.

”Pitsaasumik pingaarutilimmillu suleqatigiippugut, tamannalu Kalaallit Nunaata USA-llu oktobarip 28-anni 2020-mi oqartussaaffinni tigummilersimasatsinni suleqatigiissutigissallugu pisortatigoortumik naqissuseqqinniarlugu isumaqatigiissutigaat. Akornatsinni attaveqarnitta ineriartortinnissaa nunagisatsinnut pitsaasuussaaq, ingammik niuerneq aningaasaliisarnerlu eqqarsaatigalugit ” Pele Broberg oqarpoq.

Københavnimi naapereernerup kingorna Nunanut Allanut, Inuussutissarsiornermut, Niuernermut Silallu Pissusianut Naalakkersuisoq Pele Broberg maajip 19.-20.-anni Reykjavikiliassaaq Issittumi Siunnersuisoqatigiit naalakkersuisunik ataatsimeersuaaneranut peqataajartorluni. Tassani aamma peqataassaput USA-p nunanut Allanut Naalakkersuisua Antony Blinken, qallunaat Nunanut Allanut Naalakkersuisuat Jeppe Kofod aamma Savalimmiut Naalakkersuisunut Siulittaasuat Bárður á Steig Nielsen.

Ataatsimiinnerit tamarmik COVID-19 pillugu maleruaqqusanut tunaartarinnilluinnassaaq oqartussat malittarisassaat innersuussutaallu tamakkiisumik maleruaanikkut.

Paasissutissat pillugit attaveqarfissaq:
Uiloq Mathæussen, Naalakkersuisut Siulittaasuata Naalakkersuisoqarfiani tusagassiutit pillugit siunnersorti, oq. +299 34 51 28 / +299 22 85 02, e-mail umat@nanoq.gl

Juno Berthelsen, Nunanut Allanut, Inuussutissarsiornermut, Niuernermut Silallu Pissusianut Naalakkersuisup allataa, oq.+ 299 26 73 72 / + 45 53 12 89 72, e-mail: jube@nanoq.gl