Karrat Kangerluanni tassaarsuaqarsinnaanerata aarlerinaateqarnera pillugu naatsorsuinerit nutaat

Karrat Karrat Kangerluanni tassaarsuaqarsinnaanerata aarlerinaateqarnera pillugu naatsorsuinerit sukumiisut nutaat pillugit Qaarsuni Niaqornanilu marlunngorneq ulloq 11. maj 2021 paasissutissiilluni ataatsimiisitsisoqarpoq.

Naatsorsuinerit takutippaat Karrat 3-miit qaqqamit sisoortoqarnera inoqarfinnut arlalinnut, kisianni pingaartumik Qaarsunut Niaqornanullu mallit qaartarnerisa sakkortoorujussullutik navianarlutillu portusoorujussuullutik qarsutsinerannik malitseqartussaasoq.

Innuttaasut paasissutissanik tunngavilimmik sumiiffinni mallit qarsutsivigisinaasaanni najugaqaannarnissaq kissaatiginerlugu imaluunniit allamut nuunnissaq kissaatiginerlugu, namminneerlutik aalajangissavaat.

Naalakkersuisut Siulittaasuat, Múte Bourup Egede, ima oqarpoq:

”Naalakkersuisuni ammasuunissaq paasiuminartuutitsinissarlu pingaaruteqarpoq – aamma tamanna ernumalersitsisinnaagaluartoq. Taamaattumik paasissutissiinerit maannakkut saqqummiuppagut aammalu innuttaasut kalluarneqartussat tamaasa isaasigut isigalugit periarfissaannik oqaluttuullugit, aamma nutaarsiassaq tujorminaraluarpalluunniit.”

Ikerasanni, Saattuni, Uummannaami Ukkusissanilu ulluni piffissanilu makkunani paasissutissiilluni ataatsimiititsinerit ingerlanneqassapput:

Ikerasak:

Pingasunngorneq ulloq 12. maj 2021 nal. 11:00.

Saattut:
Pingasunngorneq ulloq 12. maj 2021 nal. 15:30.

Uummannaq:
Sisamanngorneq ulloq 13. maj 2021 nal. 13:00 (innuttaasunut Illorsuarneersunut).
Sisamanngorneq ulloq 13. maj 2021 nal. 16:00 (innuttaasunut Nuugaatsiameersunut).
Sisamanngorneq ulloq 13. maj 2021 nal. 19:30 (Uummannami innuttaasut sinnerinut).

Ukkusissat:
Tallimanngorneq ulloq 14. maj 2021 nal. 09:00.

Paasissutissanik annertunerusunik piniarnermi attaveqarfigineqassaaq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisoqarfimmut pisortaaneq Mette Skarregaard Pedersen oqarasuaammut: 346476 / 529844 imaluunniit e-mail: mesp@nanoq.gl imaluunniit pan@nanoq.gl.

Paasissutissanut tunngaviusut
GEUS-imiit allakkiaq aaneqarsinnaavoq uani
Norges Geotekniske Institut-imit (NGI) nalunaarusiaq aaneqarsinnaavoq uani
Karrat Kangerluannut upalungaarsimanikkut aarlerinaataasunik nalilersuineq aaneqarsinnaavoq uani

Mute

Mute

Kalistat

Mute