Niaqornani, Qaarsuni, Ikerasanni, Saattuni, Uummannami Ukkusissanilu paasissutissiiviusumik ataatsimiititsinissaq

Aqagu ataasinngornermi 10. maaji 2021 angalaqatigiit, Múte B. Egede-mit siuttuuffigineqarlutik Uummannamut eqqaanullu qaqqamit sisoortoqarsinnaaneranut atatillugu paasissutissat nutaat ilisimatitsissutiginiarlugit angalaniarlutik aallassapput.

Nunaqarfinni tamani Uummannamilu innuttaasut ataatsimeeqatigineqassapput. Innuttaasut najugaqarfinnut, qaqqamit nutaamik sisoortoqassagaluarpat eqqugaasinnaasunut naatsorsukkanik nutaanik saqqummiussivigineqassapput.

Marlunngornermi 11. maaji 2021-mi Niaqornani Qaarsunilu ataatsimiititsisoqassaaq, taakkunanilu ataatsimiititsisoqareerpat paasissutissanik nutaanik imalimmik tusagassiorfinnut nalunaaruteqartoqassaaq.

Aallartitat tassaassapput:

  • Naalakkersuisut Siulittaasuat Múte B. Egede.
  • Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund.
  • Avannaata Kommuniani borgmesterinngortussaq Sakio Fleischer.
  • Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup pisortaanera kiisalu Kalaallit Nunaanni Upalungaarsimanermut Ataatsimiititaliami siulittaasoq Mette Skarregaard Pedersen.
  • Aatsitassanut Naalakkersuisoqarfimmi ujarassiooq Jonas Petersen.
  • Avannaata Kommuniani kommunaldirektøri Nick Nielsen.
  • Politimesteri Bjørn Bay aamma Politikommissæri Johan Westen.
  • Tarnit pissusaannik ilisimasallit Lars Husted aamma Naja Lund Kielsen.
Niaqornani, Qaarsuni, Ikerasanni, Saattuni, Uummannami aamma Ukkusissani ulluni piffissanilu ukunani paasissutissiiviusumik ataatsimiititsisoqassaaq:

Niaqornat: 
Marlunngorneq 11. maaji 2021 nal. 10:00. 

Qaarsut: 
Marlunngorneq 11. maaji 2021 nal. 14:30.

Ikerasak: 

Pingasunngorneq 12. maaji 2021 nal. 11:00.

Saattut: 

Pingasunngorneq 12. maaji 2021 nal. 15:30.

Uummannaq: 
Sisamanngorneq 13. maaji 2021 nal. 13:00 (Illorsuarniit innuttaasunut)
Sisamanngorneq 13. maaji 2021 nal. 16:00 (Nuugaatsiamiit innuttaasunut)
Sisamanngorneq 13. maaji 2021 nal. 19:30 (Uummannamiit inuttaasut sinnerinut). 

Ukkusissat:
Tallimanngorneq 14. maaji 2021 nal. 09:00. 

Attaveqarfissaq
Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup pisortaanera Mette Skarregaard Pedersen oqarasuaat: 346476 / 529844-mut imaluunniit e-mail-it: mesp@nanoq.gl imaluunniit pan@nanoq.gl. aqqutigalugit attaveqarfigineqassaaq.