Ininut kikkunnilluunniit iserfigineqarsinnaasunut piumasaqaatinik nutaamik qasukkaanissat

Naalakkersuisut katersuunnermut nalunaarummi ininut kikkunnulluunniiit iserfigineqarsinnaasunut piumasaqaatinik qasukkaanissaq aalajangiuppaat, matumani nalunaarut 8. maaji 2021-mi atuutilissalluni.

Katersuuttarnermut nalunaarummi nutartikkami assersuutigalugu pisiniarfinni inuit qassit ininut kikkunnulluunniit iserfigineqarsinnaasunut isersimasinnaanerinut killilersuinerit atorunnaarsinneqassapput. Taamaalilluni inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat taamaallaat isersimaqqusaanerannik killilersuinerit taamaatinneqarput. Piumasaqaatit sinneri allanngortinneqanngillat taamaammallu suli atuutsinneqarlutik, tamatumunnga ilanngullugit eqqiluisaarnissaq pillugu Nunatta Nakorsaaneqarfianiit paasissutissartalinnik nivinngaassuisoqartarnissaa, Nunatta Nakorsaaneqarfiata innersussutai malinneqarnissaat sapinngisamillu pisinianut pulaartunullu imermik qaqorsaammillu imaluunniit assammut spritimik peqarnissaa.

Taakku saniatigut inuit 50-it sinnerlugit peqataassappata, pequtinut aamma atortunut peqataasunit attorneqartartunut tunillannartuiarneqarnissaannik piumasaqaat peerneqarpoq.
Naggataatigut assartuutit issiaffiusinnaasut sinnerlugit ilaasoqaqqusaannginnera piumasaqaataajunnaarpoq.

Nalunaarut Naalakkersuisut nittartakkatigut saqqummiussisarfianni atuarneqarsinnaavoq.

Immikkoortortaqarfimmi pisortaq Martin Pedersen mrpd@nanoq.gl-ikkut imaluunniit oqaras.: +299 34 66 18-ikkut attavigineratigut paasissutissat annertunerusut pissarsiarineqarsinnaapput