Naalakkersuisut uranimut naaggaaraluarlutik aatsitassarsiorluni suliaqarnerit tapersersorpaat

Allattoq Ineqarnermut, Attaveqatigiinnermut, Aatsitassanut Naligiissitaanermullu Naalakkersuisoq, Naaja H. Nathanielsen

Qineqqusaarnermi uranimik piiaanissamut akerliuneq qulequttani initoorujussuuvoq. Qulequtaq politikkikkut partiinut avissaartuutsitsivoq, qulequtarlu innuttaasunit sammineqangaatsiarluni. Taamaattumik oqallinneq aamma nunatsinni nunanilu allani aviisinut TV-mullu annguppoq. paarlattuanik aatsitassarsiorfimmik ingerlatsinermut tapersersuinerup politikkikkut annertuumik isumaqatigiissutigineqarnera eqqartorneqarpallaanngilaq. Kisianni taamaappoq aammalu partiini politikkikkut assigiinngissutaasut akimorlugit atuulluni.

Ilisimasakka malillugit partiit arlaannaannilluunniit aatsitassarsiorfinnik ingerlatsinermut akerliusoqanngilaq. Paarlattuanik siunissami aatsitassanut suliassaqarfik innuttaasunut tamaginnut iluaqutaasumik aningaasaqarnitsinnut ilaalissasoq pillugu sakkortuumik isumaqatigiillutalu takorluugaqarpugut. Naalakkersuisunngortut piffissamut 2020-2024-mut aatsitassanut periusissiaq atuuttoq aalajangiusimaannarpaat aammalu inatsisit ullumikkut ippassaq atuuttut assigaat. Taamaattumik suliassat pinngoqqaatinik qinngornernik ulorianartunik akulinnik piiaanermik ilaqanngippata, aningaasaliisartut suliassanik ineriartortitsinermi toqqissisimallutik peqataasinnaapput.

Pinngoqqaatinik qinngornernik ulorianartunik akulinnik piiaanissap atuinissallu akerlerineqarnera Kalaallit Nunaanniinnaq pinngilaq. Aamma nunarsuarmi sumiiffinni allani qulequtaq oqallitsitsisarpoq. Suliassat (ikittuaraannaat) pinngoqqaatinik qinngornernik ulorianartunik akulinnik suliaqarfigineqartussat atugassarititaasut immikkut ittut tunngavigalugit tunniussivigalugit, maannamut nunatsinni aaqqiisarsimavugut. Atugassarititaasut immikkut ittut taakkua pinngoqqaatinik qinngornernik ulorianartunik akulinnik piiaanissamut periarfissanut sillimaffeqartinneqarput. Tassunga atatillugu oqaatigissallugu pingaaruteqarpoq, atugassarititaasut immikkut ittut Naalakkersuisunit assigiinngitsunit akuerineqartarsimammata. Taamaattumik atugassarititaasut immikkut ittut taamaallaat partiimi politikkikkut apeqqutaaginnanngillat, kisianni aamma uagut oqartussatut suliassani pisariaqalernerani unitsitsisussamik ilanngussinissamik pisariaqartitsinermut tassani aamma pineqarsimalluni, tassami pinngoqqaatinik qinngornernik ulorianartunik akulinnik piiaaneq, nakkutiginninnermut nakkutilliinermullu tunngatillugu oqartussanit annertoorujussuarmik suliaqarfigineqartussaammat, tassungalu atatillugu avatangiisinut, peqqinnissamut inuiaqatigiinnullu tunngasut immikkuullarilluinnarsinnaallutik.

Aatsitassarsiorfinnik ingerlatsinissamut aallaavigineqartut pillugit, pingaartumik pinngoqqaatinut qinngornernik ulorianartunik akulinnut tunngatillugu, ersarissumik paasitinneqarnissaq pisariaqartinneqartoq Naalakkersuisunngortut paasisinnaalluarpaat. Naalakkersuisooqatigiit uranimik piiaanissamut tapersersuisuunngillat aammalu isumasiuinerit nutaanerusut malillugit taamatut isumaqarneq innuttaasunit amerlasoorpassuarnit isumaqatigineqarpoq. Taamaattumik eqissiviilliortoqannginnissaa eqqarsaatigalugu Kalaallit Nunaanni aatsitassanik qinngornernik ulorianartunik akulinnik piiaanissamut ersarissunik malittarisassaqalernissaq pisariaqarpoq. Ukioq manna akuersaanngilluinnarnissamut siunnersuummik saqqummiussisinnaanissaq naalakkersuisooqatigiit naatsorsuutigaat, taassumalu Inatsisartuni oqallisigineqarnissaa qilanaaralugu.

Kuannersuarni Greenland Mineralsip suliassaanut tunngatillugu, taanna Aatsitassanut ikummatissanullu inatsit aammalu atugassarititaasut immikkut ittut ingerlatseqatigiiffimmut atugassaritinneqartut naapertorlugit suliarineqassaaq. Naalakkersuisut inatsisit atuuttut malillugit sulipput aammalu atugassarititaasut aatsitassarsiorluni misissuinissamut akuersissummi aalajangersagaasut malittussaallugit. Greenland Mineralsimut tunngatillugu piiaanissamut qinnuteqaataanut tunngatillugu tamanut ammasumik tusarniaanissaq pilersaarutaareerpoq, taassumalu naammassineqarnissaa soorunami peqataaffigissavara. Kisianni isertussanngilara tamatuma ingiaqatigisaanik uranimik piiaanissap pinngitsoortinnissaanut – aamma Kuannersuarni suliassamut tunngatillugu – inatsisip aamma aatsitassarsiorluni misissuinissamut akuersissutip killissaasa iluanni periarfissat suunersut nalilersussagakkit.

Taamaalilluni Naalakkersuisut siunnerfinnut anguniarneqartunullu nalornissuteqanngillat. Aatsitassarsiorfinnik ingerlatsinissaq angerparput aammalu urani naaggaarlugu. Aningaasaliiumasut tikilluaqquagut aammalu innuttaasunut inuiaqatigiinnullu iluaqutaasumik suliassanik ineriartortitsiniarluta. Killissat isumaqatigiissutaareersut iluanni sulivugut aammalu allatut eqqarsaateqarsimanngisaannarluta. Aamma suliassat pissanganartorpassuit nunarput tamakkerlugu siaruarsimasut, pinngoqqaatinik qinngornernik ulorianartunik akulinnik ilaqanngitsut, ullut tamaasa nuannaarutigaagut.