Naalakkersuisup tunisinermi akit aalajangersorneq ajorpai

Tunisinermi akit aalisakkanik pisisup aalisartullu, kattuffiillu isumaqatigiissutigalugit aalajangersortarpaat.

Aalisarnermut Piniarnermullu Naalakkersuisup Aqqaluaq Biilmann Egede allakkatigut oqaatitsigullu piffissami kingullermi saaffigineqartuartarpoq nunatsinni aalisakkat assigiinngitsut tunineqartartut akiinut aaqqiissuteqarsinnaannginnersoq.

Aalisarnermut Piniarnermullu Naalakkersuisoqarfimmit erseqqissaassutigineqassaaq Naalakkersuisoq imaluunniit Naalakkersuisoqarfik aalisakkanut assigiinngitsunut akinik isumaqatigiissuteqarniartartuunngimmata.

Sumiiffinni nunallu imikkoortuini nunatsinni aalisakkanut assigiinngitsunut tunisinermi akit, soorlu pitsaassutsinut aamma angissutsinut akigitinneqartartut aalisakkanik pisisup aalisartullu, suliniaqatigiiffiillu isumaqatigiissutigalugit aalajangersortarpaat.

Taamaattumik Aalisarnermut Piniarnermullu Naalakkersuisoq nunatsinni aalisakkat qanoq akeqarnissaannut aalajangersaanerni peqataaneq ajorpoq.

Aalisarnermut Piniarnermullu Naalakkersuisoq erseqqissaavoq aalisarneq pillugu malinnaaqqissaarluni, aamma kattuffiit aalisarnermillu susassaqartut qanimut suleqatiginissaat qilanaaralugu.

Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl