Nannunik naammattoorsinermi malittarisassat najoqqutallu eqqaasitsissutigineqarput

Nuup eqqaani nanoq anaanaq piaraalu takuneqarsimasut pillugit Aalisarnermut Piniarnermullu Naalakkersuisoqarfimmiit malittarisassat atuuttut innersuutigineqassapput aammalu erseqqissaatigineqarluni nannunik inoqarfiit eqqaanni iluaniluunniit naammattoorsinermi maleruagassanik malinninnissaq.

Ilimagineqarpoq sap. ak. marluk iluanni nannut Qeqertarsuatsiaap Nordafarillu eqqaanni takuneqartartut pineqartut. Taakkunani malittarisassat ataqqineqarmata aamma naatsorsuutigaarput matumani Nuup eqqaani taamaattoqarnissaa.

 

”§ 3. Nannut Kalaallit Nunaata nunataani aalisarnikkullu oqartussaaffigisaani eqqissisimatitaapput, taamaattorli § 5 takuuk.

Imm. 3.  Piaqqat arnaminnik pisariaqartitsisut arnavissallu ataatsimik arlalinnilluunniit piaqqisartut ukioq naallugu eqqissisimatitaapput.

Imm. 4.  Nannut apissiminniittut akornusersornissaat taamatuttaaq apissiinik assaanissaq inerteqqutaapput.

 

§ 4. Nannunik qammaaneq, ujaasineq, malersuineq allatulluunniit akornusersuinissaq inerteqqutaapput.

Imm. 2. Taamaakkaluartoq nannunik ujaasisoqarsinnaavoq malersuisoqarsinnaallunilu inatsisit malillugit piniarnermut aallaaniarnermullu atatillugu, takuuk § 8, imaluunniit nannumik sumiiffimmiit qimaatitsiniarnerup ilaatut, takuuk imm. 3.

Imm 3. Politiit, piniarnermik nakkutilliisut, kommunefogedit, inuilluunniit allat pisinnaatinneqartut nannunik sumiiffimmiit qimaatitsiniarlutik ungoorineranni akornusersornissaat inerteqqutaavoq.

Imm. 4. Dronit nannunik filmiliornermut allatulluunniit malersuinermut atornissaat inerteqqutaavoq.”

 

Naalakkersuisoqarfiup aamma nalunaarummi “Allatut ajornartumik imminullu illersorniarluni nannunneq” pillugu § 18:

Ҥ 18. Nanoq allatut ajornartumik imminullu illersorniarluni toqunneqarpat Pinerluttulerinermi inatsimmi malittarisassat naapertorlugit nannup pisatai tamaasa Kalaallit Nunaanni Namminersorlutik Oqartussat pissavaat.

Imm. 2. Allatut ajornartumik imminulluunniit illersorniarluni toqutsisoqartillugu utaqqeqqaarani inummit nannuttumit Aalisarnermut, Piniarnermut Nunalerinermullu Naalakkersuisoqarfimmut nalunaaruteqartoqartassaaq.

 

§ 22. Aalisarnermut, Piniarnermut Nunalerinermullu Naalakkersuisoqarfik nanoq ajornartorsiutaasutut nalilerneqarpat nalunaarummi malittarisassat atuutsinneqannginnissaannik nalunaaruteqarsinnaavoq.

Imm. 2. Nannumik toqutsinnginnermi imm. 1 naapertorlugu immikkut akuersissut nalunaarutigineqartassaaq.

Imm. 3. Piniarnermik nakkutilliisut, politiit imaluunniit Aalisarnermut, Piniarnermut Nunalerinermullu Naalakkersuisoqarfimmit inuit pisinnaatinneqartut taamaallaat imm. 1 naapertorlugu nannumik toqutsisinnaatitaapput.  

Imm. 4. Nanoq imm. 1 naapertorlugu toqunneqarpat nannup pisatai tamarmik Kalaallit Nunaanni Namminersorlutik Oqartussanut tunniunneqassapput.”

 

Naalakkersuisoqarfiullu aammattaaq innersuussutigissavaa nannunik ajornartorsiuteqarnermi Naalakkersuisoqarfiup maleruaqqusai, tassani ilaatigut ima allaqqavoq:

 

“Nannut inunnik, uumasuutinik, atortunik, illunik il.il. ulorianartorsiortitsisinnaapput. Saassunneqaataasinnaasumik iliuuseqartoqassanngilaq.

Misigisassarsiorusunneq nannunilluunniit assileerusunneq ilinnik, allanik nannunilluunniit ajornartorsiortitsissanngilaq.”

 

“Nannunik nerisitsineq narassiinissarluunniit mianersoqqussutigineqarput, tassa nannut inuit tipaat nerisassatut paasisarmatigit. Tamanna kinguneqarsinnaavoq nannut inoqarfinnut uteqattaarnerannik.”

 

Taamaattumik Naalakkersuisoqarfiup ilaatigut takornariartitsisartut peqqussavai nannunik qimaatitsiniartut nannullu akornusersoqqunagit.

 

Inoqarfiit iluanni Politiit aallaasersornermut oqartussaasuupput, taamaaliortariaqalertoqassappat.

 

 

 

 

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 42, e-mail: amalie@nanoq.gl