Akiuussutissat qaninnerulersissavaatigut

WHO-p ukiumoortumik ”World Immunization Week” apriilimi sapaatip akunnerani kingullermi malunnartittarpaa.

COVID-19-ip nunarsuaq tamakkerlugu tuniluunnera pissutigalugu, ukioq manna sapaatip akunnera immikkut pingaaruteqarluinnarpoq.

Nunarsuaq Tamakkerlugu Akiuussutissat Sapaatip akunneqartinneqarneranik siunertaavoq akiuussutissat piffissap ingerlanerani pitsaasumik sunniuteqaatigisima-saannik ukkatarinnilersitsinissaq.  Akiuussutissat ullumikkut nappaatit tuniluuttut, soorlu mæslingit akornuteqanngitsumik siaruaassinnaannginnerannut isumalerujussuupput. Akiuussutissat qulakkeertarpaat, meeqqatta perulunnartunik tuniluuttunik nappaateqaratik peroriartorsinnaanerat kiisalu nappaatit tuniluuttut kingunerisaannik toqusoqannginnissaa innarluuteqalertoqannginnissaalu.

 

”Inuunitsinni maannakkut aatsaat taama ersaritsigivoq akiuussutissat qanoq iluaqutaatiginerat. Coronavirusimut akiuussutissap isumannaatsumik arriitsumillu nunarsuaq ammariartoqqikkaa misigaarput. Kalaallit Nunaanni nunarsuup sinneranut qanittuunissaq pisariaqartipparput,  tamannalu taamaallaat pisinnaavoq sapinngisamik amerlanerpaat akiuussutissamik kapineqarpata”, Kirsten L. Fencker oqarpoq.

 

COVID-19-imut akiuussutissamik kapineqarnissamut neqeroorut nunami peqqinnissap qulakkeernissaanut sakkussatut pingaaruteqarpoq. Kalaallit Nunaata killeqarfii ammaqqippata, pingaaruteqarpoq 18-init qummut ukiullit tamarmik akiuussutissamik kapineqarsimanissaat. Taamaallaat taamaasiornikkut inuiaqatigiinni tuniluunnerup siammarnissaa pinaveersaartinneqarsinnaavoq. Peqqissutsimut Naalakkersuisup akiuussutissaq pillugu kisitsisit nutaanerpaat pitsaasutut isigai, taakkunani akiuussutissamik kapineqarsimasut amerleriarsimammata.

 

Ittoqqortoormiini akiuussutissamik kapineqartut 88%-iupput, Qeqertarsuarmi 81%-iullutik kiisalu Qasigiannguani 80%-iullutik.

Maannakkorpiaq innuttaasut 8.809-t akiuussutissaq siullermeertumik pisimavaat, 4.298-illu akiuussutissamik kapitinnerit naammassisimallugit.

 

Naggataagut Kirsten L. Fencker oqarpoq, ”nuannerpoq Ittoqqortoormiini, Qasigiannguani Qeqertarsuarmilu taama amerlatigisut neqeroorut tigulluarsimam-massuk. Peqqissutsimut Naalakkersuisutut nutaatut uannut oqaatigissallugu pingaaruteqarpoq, sapinngisamik amerlanerpaat akiuussutissamik kapineqarnissaat qanoq pingaaruteqartiginersoq. Tamanna inuiaqatigiinni inuunerup nalinginnaanngor-sarnissaanut kiisalu nunatsinni COVID-19-imik tunillaassuuttoqanngiinnarnissaanut aalajangiisuulluinnarpoq”.

Paasissutissat sukumiinerusut pillugit naalakkersuisoqarfimmi pisortaq Tine Pars attavigineqarsinnaavoq oqarasuaammut 34 66 25 imaluunniit email tine@nanoq.gl .