Akiuussutissat pillugit Facebookimi tusatsiakkat eqqunngitsut

Coronamut akiuussutissat pillugit Facebookimi tusatsiakkanik eqqunngitsorpassuarnik ingerlaartitsisoqartoq, Corona pillugu Allattoqarfiup nalunaarutigaa.

Kalaallit Nunaanni akiuussutissalersuinerup kinguneranik toqqutigisamik taqqakkut milikartoortoqarsimaneranik tusatsiakkat ilumuunngilluinnartut erseqqissaassutigineqassaaq. Kalaallit Nunaanni akiuussuserneqareernerup kingunerisaanik taqqakkut milikartoortoqarnikuunngilaq toqusoqarnikuunaniluunniit. Nunatsinni akiuussutissat Modernaminngaanneersut aamma Pfizeriminngaanneersullu taamaallaat atorneqarput.

Facebookimi atuisut akiuussutissat pillugit paasissutissanut tunngatillugit pissarsianik apeqqusersuisarnissaannik Corona pillugu Allattoqarfiup kaammattorpai.

Taamaammat inuit kaammattuinnarsinnaavagut kina ikkussisuunersoq, ikkussap uppernassusaa qanorlu pilersinneqarsimanera aammalu qanoq kiminngaanniillu siammartinneqarsimanersoq pillugit isummersortoqartassasut. Kalaallit Nunaanni coronamut akiuussutissalersuinermut paasissutissat nun.gl-ikkut atuarneqarsinnaapput.

Kalaallit Nunaanni inuiaqatigiinni nalinginnaanngorsaanissaq nunarsuarlu tamakkerlugu akiuussutissalersuinerit ilutigalugit inuiaqatigiinni ammaasseqqinnissaq tullinguukkiartuaalerpoq. Taamaammat inuit akiuussuserneqassanersut nalornilernissaannut tunngavissiisumik tusatsiakkanik eqqunngitsunik siammartereqataaneq ajuusaarnarpoq.

Nunatsinni nunanilu allani pissutsit nalinginnanngorsarnissaannut akiuussutissalersuinerit aalajangiisuulluinnarput, inuiaqatigiinnilu tunillaassuinissaq pinaveersaartinneqassappat akiuussutissalersuinerit annertussusii annertuserujussuarneqassapput.

Neqerooruteqarnermut pingaarnersiuigitsi

Nunap immikkoortuisa siammasissorujussuarni sumiiffiillu assigiinngisitaartorujussuarnut akiuussutissat taamak amerlatigisut assartornissaannut pilersaarusiornerujussuuvoq, taamaammat innuttaasut illoqarfianni nunaqarfianniluunniit suli akiuussutissanik peqartoqartillugu, akiuussutissamik neqeroorfigineqarnertik akuerissagaat kaammattorneqarput. Neqeroorummut maanna naameeraanni, kingusinnerusukkullu isumaq allanngortillugu, taava akiuussutissap nalinginnaasumik pissarsiarineqarnerulernissaannut utaqqeqqaarallaratarsinnaapput.